د طالبانو د سرحدونو وزیر له تاجکستاني پلاوي سره امنیتي خبرې کړي
د طالبانو د سرحدونو، قومونو او قبایلو وزارت سرپرست ملا نورالله نوري له تاجکستانه د راغلي لوړپوړي پلاوي سره لیدلي، چې مشري یې میرزا زاده عبدالواحد کوله. دې لیدنه کې نوري پر دې ټینګار وکړ چې باید د انسانانو او مخدرو موادو قاچاق مخه ونیول شي.
د دې وزارت په یوه رسمي خبرپاڼه کې راغلي چې د دواړو خواو ترمنځ خبرې اساساً د سرحدي امنیت، سرحدي ستونزو، د سرحد په کرښه د وضاحت، او د دوه اړخیزو همکاریو د پراختیا په اړه شوې دي. نوري ویلي، طالبان د قاچاق د مخنیوي لپاره یو لړ اقدامات پیل کړي او زیاته کړې یې ده چې د مشرتابه له خوا هم ورته فرمانونه صادر شوي دي.
نوموړي همداراز ویلي چې د افغانستان او تاجکستان ترمنځ د دوستانه اړیکو پراختیا خوشحالونکې ده او طالبان هڅه کوي له بېلابېلو هېوادونو سره سیاسي او اقتصادي اړیکې ټینګې کړي. دا څرګندونې داسې مهال کېږي چې د طالبانو اداره له نړیوال مشروعیت نه ده برخمنه او د بشري حقونو د سرغړونو له امله له سختو نیوکو سره مخ ده.
د تاجکستان د پلاوي مشر میرزا زاده عبدالواحد ویلي، افغانستان او تاجکستان ګډ فرهنګي او مذهبي ارزښتونه لري، او د دواړو هېوادونو خلک د امنیت او ثبات غوښتونکي دي. نوموړي ټینګار کړی چې دواړه هېوادونه باید د سرحدي ستونزو د حل لپاره له خبرو او تفاهمه کار واخلي، او زیاته کړې یې ده چې تاجکستان د دې برخې د همکاریو ته ژمن دی.
دا وروستۍ لیدنه کېدای شي د سیمې له هغو هڅو یوه برخه وي چې د سرحدي کړکېچونو د مدیریت او د ناقانونه بهیرونو د مخنیوي لپاره کېږي، هغه موضوعات چې له کله نه طالبانو پر افغانستان کنټرول موندلی، لا پېچلي شوي دي.
