یونیسف په شپږ ولایتونو کې د ماشومانو د ودې لپاره ۱۶ اوونیز پروګرام پلې کوي
د ملګرو ملتونو د ماشومانو د ملاتړ صندوق (یونیسف) اعلان کړی چې د ماشومانو د لومړني ودې (ECD) په برخه کې به یو ۱۶ اوونیز پروګرام په شپږ ولایتونو کې پلي کړي. دغه پروګرام د والدینو د مهارتونو د پیاوړتیا او د وړو ماشومانو د ودې د حالت د ښهوالي په هدف پیل شوی دی.
د یونیسف په وینا، د ماشومانو د ژوند لومړنۍ کلونه د هغوی د راتلونکې د جوړېدو په برخه کې اساسي رول لري. په دې پړاو کې پانګونه کولای شي د ماشومانو دماغي وده، فزیکي روغتیا او د زدهکړې وړتیاوې پیاوړې کړي او د هغوی د راتلونکو بریاو لپاره زمینه برابره کړي.
په دې پروګرام کې به والدین د روزنیزو غونډو له لارې د ماشوم د پالنې او ساتنې ښې لارې زده کړي. دغه بهیر د کورنیو پر ځانباورۍ د زیاتېدو او د کورني روزنې د تګلارو په ښهوالي کې مرسته کوي.
یونیسف ټینګار کړی چې د ماشوم د لومړني ودې تمرکز نه یوازې د هر ماشوم پر انفرادي حالت اغېز کوي، بلکې په اوږدمهال کې د ټولنیزو پایدارو بدلونونو د رامنځته کېدو لامل هم ګرځي، په ځانګړي ډول په افغانستان کې چې ماشومان د نفوس لویه برخه جوړوي.
