پاکستان وايي د ټي ټي پي مشران په افغانستان کې دي؛ د پولې هاخوا بریدونه دوام لري
د پاکستان د اطلاعاتو او نشراتو وزارت ویلي، د دغه هېواد پوځ د تلافۍ په یوه اقدام کې د تحریک طالبان پاکستان (ټي ټي پي) او د هغې اړونده ډلو، په شمول د داعش خراسان، اووه کمپونه او پټنځایونه د افغانستان او پاکستان د پولې په سیمو کې په نښه کړي دي. د طالبانو د حکومت یوه چارواکي ویلي، چې دا بریدونه د شنبې په شپه، د حوت دویمه، د پکتیکا او ننګرهار پنځه ولسوالۍ یې نښانې کړې دي.
د دې چارواکي په وینا، د پاکستان جنګي الوتکو د ننګرهار د بهسود، خوګیاڼو او غني خېلو ولسوالۍ، او همدارنګه د پکتیکا د برمل او ارګون ولسوالۍ بمبار کړي دي. تر اوسه د احتمالي تلفاتو او تاوانونو په اړه جزییات نه دي خپاره شوي.
د پاکستان د اطلاعاتو وزارت په یوه اعلامیه کې ادعا کړې چې دوی «قطعي» اسناد لري، چې ښيي تحریک طالبان پاکستان د اسلاماباد په یوه جومات برید او همدارنګه د باجور او بنو د امنیتي پېښو مسوول دی. په خبرپاڼه کې دا هم ویل شوي چې د شنبې د ورځې، د حوت دویمې، برید په بنو سیمه کې چې لږ تر لږه د پاکستان د دوو امنیتي سرتېرو د وژل کېدو لامل شو، د همدې ډلې له خوا تنظیم شوی و.
په اعلامیه کې دا هم ویل شوي چې دا بریدونه د هغو کسانو له خوا ترسره شوي چې مشران او همغږي کوونکي یې په افغانستان کې مېشت دي. پاکستان د تحریک طالبان پاکستان ته د «خوارجو» نوم کارولی او یو ځل بیا یې له د طالبانو له ادارې غوښتنه کړې چې د افغانستان له خاورې د پاکستان پر ضد د کارېدو مخه ونیسي.
اسلاماباد ټینګار کړی چې سره له پرلهپسې هڅو د طالبانو د ادارې د عملي اقدام د هڅولو لپاره، د پاکستان په وینا، لا تر اوسه «ملموس او تاییدېدونکي» ګامونه د هغو وسلهوالو ډلو د کنټرول لپاره نه دي پورته شوي چې د پاکستان پر ضد فعالیت کوي. دا په داسې حال کې ده چې د دې وضعیت دوام د دواړو هېوادونو د پولو په سیمو کې د تاوتریخوالي د زیاتېدو او د خلکو پر ژوند د اغېزو په اړه اندېښنې زیاتې کړې دي.
د پولې هاخوا د بریدونو دوام او د ځوابورکوونې د واضح میکانیزم نشتوالی دا پوښتنې راولاړې کړې چې د افغانستان له خاورې د امنیت خوندیتوب او د وسلهوالو ډلو د فعالیت د مخنیوي څرنګوالی به څنګه وي.
