په آقینه بندر کې څلور بنسټیزې پروژې ګټې اخيستنې ته وسپارل شوې او د يو نوي هنګر کار پيل شو
سيمه ييزو او تخنيکي چارواکو ويلي چې په فارياب ولايت کې د آقينه تجارتي بندر څلور زېربنايي پروژې د ۱۳۴ ميليونه افغانيـو په لګښت بشپړې شوې او ګټې اخيستنې ته وسپارل شوې دي، او هممهاله د ۲۱ ميليونه افغانيـو په ارزښت د يو نوي هنګر د جوړولو کار هم پيل شوی دی. د چارواکو په وينا، د دغو پروژو د پلي کولو موخه د ګمرکي چارو د بهير اسانتيا او د سوداګرانو لپاره د خدمتونو ښه والی دی.
انجنير نجيبالله ابراهيمي، چې د طالبانو تر ادارې لاندې د ماليې وزارت د ګمرکي پروژو کارپوه دی، ويلي چې بشپړې شوې پروژې پکې د آقينه ګمرک د ۲.۷ کيلومتره اوږدې احاطوي دېوال اعمار له اتو برجونو سره، د ۵.۵ جريبه ځمکې په مساحت د وسايطو پارک جوړول، د ۲۵ زره دوسيو د ساتلو ظرفيت لرونکی آرشيف ودانۍ جوړول، د ګمرک د رئيس او مرستيال لپاره درې استوګنيزې ودانۍ او همداراز د اوروژنې، لودر، ټانکر او دمټرک په شمول د څلورو وسايطو پېرل شامل دي.
نوموړي زياته کړه چې د بندر په انګړ کې د يو نوي هنګر د جوړېدو کار هم پيل شوی، چې اټکلی لګښت يې ۲۱ ميليونه افغانۍ دی. چارواکي وايي، د دغه هنګر د جوړولو موخه د تجارتي اجناسو د مديريت ښه والی او د معاينې او ساتنې بهير چټکتيا ده.
د آقينه بندر د فارياب ولايت د خان چار باغ ولسوالۍ په حوزه کې د ترکمنستان له پولو سره نږدې موقعيت لري او د هېواد په شمال کې له مهمو تجارتي لارو څخه ګڼل کېږي. د چارواکو په وينا، هره ورځ شاوخوا ۳۵۰ تجارتي موټر د دې بندر له لارې تبادله کېږي.
ملا عبدال احد فضلي، چې د طالبانو تر ادارې لاندې د فارياب والي دی، د دغو پروژو د پرانيستې په مراسمو کې وويل چې له بشپړېدو سره به د آقينه ګمرک کې لا زياتې اسانتياوې رامنځته شي. خو يو شمېر سوداګر ټينګار کوي چې د دوامدارو اسانتياوو رامنځته کول د شفافې مديريت، د بيروکراسۍ د کمېدو او د غير ضروري خنډونو د مخنيوي ته اړتيا لري — هغه موضوع چې تمه کېږي چارواکي يې د زېربنا د پراختيا تر څنګ جدي پام ته ونيسي.
