روسیې د جېنو خبرې ستونزمنې وبللې، خو راتلونکی پړاو ژر ترسره کېږي
د روسیې د خبرو اترو د پلاوي مشر اعلان کړی چې د مسکو، واشنګټن او کییف ترمنځ درې اړخیزې درېیمې دور خبرې په جېنو ښار کې له ستونزو سره مخ وې، خو په مسلکي ډول پر مخ ولاړې. دا خبرې د روسیې، اوکراین او د امریکا د استازو په ګډون د سهشنبې او چهارشنبې په ورځو د سویس په پلازمېنه کې ترسره شوې.
ولادیمیر مدینسکي، د روسیې لوړپوړي مرکچي، له ناستو وروسته روسي رسنیو ته وویل چې د خبرو فضا «سخت خو کاري» وه. هغه زیاته کړه چې اړخونو منلې چې راتلونکی پړاو به ژر ترسره شي، که څه هم دقيق وخت لا نه دی ټاکل شوی.
دا پړاو خبرې په داسې حال کې ترسره شوې چې له څو پړاوونو خبرو وروسته، د روسیې او اوکراین جګړه لا هم روانه ده. د شخړو سیمې او ځمکنۍ اختلافونه لا هم د وروستي تړون د ترلاسه کولو اصلي خنډ بلل کېږي.
په جګړه ییزو ډګرونو کې، دواړه هېوادونه هڅه کوي تر خپل کنټرول لاندې سیمو د ساتنې او پراختیا له لارې خپلې دریځونه پیاوړي کړي؛ دا موضوع د سیاسي خبرو په بهیر مستقیم اغېز لري.
په همدې حال کې، متیو ویتاکر، د امریکا د متحده ایالاتو دایمي استازی په ناټو کې، تېرمهال ویلي و چې واشنګټن هیله لري د ځمکنیو اختلافونو موضوع به په راتلونکو ورځو او اونیو کې روښانه شي. د هغه په وینا، د خبرو ګډونوال هممهال په څلورو وروستیو اسنادو کار کوي چې پکې د ۲۰ مادو لرونکې د سولې طرحه، څو اړخیزې امنیتي ضمانتونه، د امریکا لهخوا ځانګړي امنیتي تضمینونه او د سولې وروسته د اقتصادي ودې او پرمختګ پلان شامل دي.
جېنو په تېرو کلونو کې د اوکراین د کړکېچ اړوند د څو پړاوونو خبرو کوربه پاتې شوی او سویس د خپل سیاسي بېطرفۍ له امله د نړیوالې ډیپلوماسۍ له مهمو مرکزونو څخه شمېرل کېږي.
