د ازادۍ جبهې ادعا: په کندز کې دوه د طالبانو غړي وژل شوي
د افغانستان د ازادۍ جبهې ويلي چې د دوی د ځواکونو د يوې حملې په پایله کې چې د طالبانو د ادارې پر يوه پلټنيز پوسته په کندز ښار کې ترسره شوې، د طالبانو دوه جنګيالي وژل شوي او دوه نور ټپيان شوي دي. د دې جبهې په وينا، پېښه د کندز په بالاحصار چوک کې رامنځته شوې ده.
دا جبهه د سهشنبې په ورځ، د دلو ۲۸مه، د يو ويډيويي پيغام په خپرولو سره ادعا وکړه چې ياد بريد دوی تنظيم کړی دی. په دغه ويډيو کې د شپې د جګړې صحنې ښودل شوي، خو د طالبانو اداره تراوسه په دې اړه رسمي نظر نهدی څرګند کړی.
د ازادۍ جبهې دا هم ويلي چې په کندز او يو شمېر شمالي ولايتونو کې د دوی د بريدونو زياتوالی د طالبانو اداره اندېښمنه کړې ده. دغه جبهه دوه ورځې وړاندې هم د يو بل بريد مسووليت منلی و چې د دوی په وينا، په هغه کې هم د طالبانو دوه غړي وژل شوي ول.
په تير يوه اونۍ کې، بدخشان، تخار او کندز ولايتونه د طالبانو پر ځواکونو د بېلابېلو بريدونو شاهدان پاتې شوي دي. دا د شمالي سيمو امنيتي پېښې په داسې حال کې دوام لري چې د طالبانو اداره تل د هېواد له عمومي امنيت خبر ورکوي، خو د مخالفو ډلو د دوامدارو وسلوالو بريدونو له امله دغه ادعا له جدي پوښتنو او شکونو سره مخ ده.
