په بامیان کې د ځمکني ترانسپورت له لارې له ۱۸ میلیونه افغانیو زیاته عواید راټول شوي
د بامیان ولایت د ځمکني ترانسپورت ریاست وايي چې په تېرو اته میاشتو کې، له دغه ولایت د مسافرو او بار وړونکو تمځایونو او ترانسپورتي بندرونو څخه له ۱۸ میلیونه زیاتي افغانۍ عواید راټول شوي او د دولت خزانه ته سپارل شوي دي.
د دې ریاست مالي او اداري مسؤول محمد طاهر حمیدي رسنیو ته ویلي، دا اندازه عواید چې ۱۸ میلیونه، ۲۵۰ زره او ۱۰۶ افغانۍ جوړوي، له اووه تمځایونو او څلورو محلّي بندرونو څخه ترلاسه شوي دي.
نوموړي زیاته کړې چې د بامیان ښار دننه او ولسوالیو او ګاونډیو ولایتونو پر لارو د مسافر وړونکو موټرو کرايې د ټاکل شوې کمېټې لهخوا تنظیمېږي او څارل کېږي، څو د ګډوډۍ او ناوړه ګټې اخیستنې مخه ونیول شي.
حمیدي همداراز وویل چې د ښاري نظم د ښه والي لپاره درې نوي تمځایونه هم جوړ شوي دي او اداره یې هڅه کوي، له ځانګړو پروژو سره د ترانسپورتي ستونزو کچه راکمه کړي.
د مسؤولانو د معلوماتو پر بنسټ، د ښاري او بینالولایتي تاکسۍ، د فعالو وسایطو پېژندنه او د ترانسپورتي کمیسیون منظم راټولول دې ادارې د روان کال تر پایه د کاري برنامو برخه ده.
که څه هم دا فعالیتونه کولای شي د ترانسپورت ځینې ستونزې کمې کړي، خو تجربه ښيي چې د شفافې څارنې او د مسؤلو بنسټونو د قانونمند حضور پرته، ډېری دا پروګرامونه له جدي ستونزو سره مخ کېږي. د طالبانو تر اداره لاندې د دا ډول پروسو دوام، پرته له شفاف تضمین، د ډېرو خلکو ذهن ته پوښتنې راولاړې کړې دي.
