د کابل د پنځه ورځني ودانیز نندارتون د لس میلیونه ډالرو قراردادونو په لاسلیک سره پای ته ورسېد
د ودانیز، بیا رغونې او ساختماني چارو درېیم نړیوال پنځه ورځنی نندارتون په کابل کې د کورنیو او بهرنيو شرکتونو تر منځ د لس میلیونه ډالرو ارزښت لرونکو قراردادونو په لاسلیک سره پای ته ورسېد.
محمد صابر لطیفي، د افغانستان د نندارتونونو د نړیوال مرکز مشر، وویل چې دا قراردادونه د نندارتون د ترسره کېدو پر مهال د ګډون کوونکو شرکتونو تر منځ لاسلیک شوي دي. د نوموړي په وینا، دغه نندارتون د ودانیز سکتور د ظرفیتونو د معرفي کولو او د پانګهوالو تر منځ د مستقیمو اړیکو د ټینګښت زمینه برابره کړې وه.
یو شمېر افغان صنعتکارانو چې په دې نندارتون کې حاضر وو، د هېواد اوسنی وضعیت د ساختماني او تولیدي پانګونې لپاره مناسب وباله. هغوی له هغو افغان پانګهوالو غوښتنه وکړه چې له هېواده بهر مېشت دي، ترڅو هېواد ته را وګرځي او د کورني پانګونې له لارې د اقتصاد په وده او د کاري فرصتونو په رامنځته کولو کې برخه واخلي.
د ودانیزو چارو تخصصي نندارتونونه د هغو پروګرامونو له ډلې څخه دي چې موخه یې د خصوصي سکتور پیاوړتیا، د پانګې جذب او د زیربناوو پراختیا بلل شوې ده؛ هغه برخه چې د کارموندنې او اقتصادي ودې په برخه کې مهم رول لري.
