د پاکستان له لوري د افغان کډوالو جبري ایستنه د رمضان له پیل سره چټکه شوې
د رمضان د میاشتې له پیل سره، د پاکستان له لوري د افغان کډوالو د جبري شړلو بهیر چټک شوی دی. د ننګرهار سیمهییزو چارواکو په وینا، هره ورځ په اوسط ډول نږدې اته سوه کورنۍ د تورخم له لارې هېواد ته راستانه کېږي. دا زیاتوالی په داسې حال کې رامنځته شوی چې ډېری کورنۍ وايي، بېخبره او تر فشار لاندې اړ شوې دي چې خپل د اوسېدو ځای پرېږدي.
یو شمېر بېرته راستانه شوي کسان وایي چې د پاکستان پولیسو د دوی پر کورونو چاپې وهلې، برېښنا یې پرې کړې، د سیم کارتونه یې بند کړي او ان دوکانونه یې تخریب کړي دي. د دوی په وینا، دا کارونه د رمضان د میاشتې د درناوي له پامه غورځولو سره ترسره شوي او کورنۍ یې اړې شوې چې خپل څوکلن شتمنۍ او پانګه وشړي.
د ننګرهار د اطلاعاتو او فرهنګ ریاست ویلي چې د طالبانو ادارې له خوا په تورخم کې د بېرته راستانه شویو د چارو د سمبالولو لپاره له لسو ډېرو کمېټو فعالیت پیل کړی او لومړني خدمات وړاندې کوي. د دغه ریاست د اطلاعاتو مسوول، قریشي بدلون، ویلي چې د تېر په پرتله د خدمتونو کچه لوړه شوې او د مرستو بهیر دوام لري.
بلخوا، عطاالله عمري، د طالبانو د زراعت، اوبولگولو او مالدارۍ سرپرست وزیر، د غنمو او نغدو مرستو د وېش په غونډه کې په ننګرهار کې وویل، له دې ادارې د بیاواکمنېدو راهیسې شاوخوا څلور نیم میلیونه افغان کډوال له ایران او پاکستانه هېواد ته راستانه شوي او منظمې مرستې یې ترلاسه کړي دي.
سره له دې څرګندونو، د رمضان له پیل سره د جبري ستنېدنو زیاتوالی په هېواد کې د استوګنځایونو برابرولو، د کار زمینې رامنځته کولو او ابتدایي خدمتونو ته د لاسرسي په اړه اندېښنې راپورته کړې دي. ګڼ شمېر خلک باور لري چې د بېرته راستانه شویو د وضعیت اغېزمن، شفاف او اوږدمهاله سمبالول د اړوندو ادارو ستره دنده ده او ښکاره او حساب ورکوونکې پلان جوړونې ته اړتیا لري.
