د اوربند اعلان سره سره د غزې تاوانونه دوام لري
د غزې د فلسطین د روغتیا وزارت اعلان کړی چې سره له دې چې اوربند اعلان شوی، د اسراییلو بریدونه لا هم دوام لري او د ۲۰۲۳ کال د اکتوبر له اوومې نېټې راپه دېخوا د جګړې د قربانیانو شمېر ۷۲ زره او ۶۳ تنو ته رسېدلی دی. د دې وزارت د وروستي راپور له مخې، د ټپیانو شمېر هم ۱۷۱ زره او ۷۲۶ کسانو ته لوړ شوی دی.
د دې ادارې په ورځني راپور کې راغلي چې یوازې په تېرو ۲۴ ساعتونو کې د دوو وژل شوو کسانو جسدونه د غزې روغتونونو ته انتقال شوي او ۱۱ تنه نور ټپیان شوي دي. همدارنګه ویل شوي چې د ځينو قربانیانو جسدونه لا هم د ویجاړو شویو ودانیو لاندې یا په سړکونو کې پاتې دي او د ژغورنې ډلې د محدودیتونو له امله نه شي کولای هغوی ته ورسېږي.
د غزې د روغتیا وزارت زیاتوي چې له هغه وخته چې د اکتوبر په ۱۱مه اوربند ټینګېدلی، ټولټال ۶۰۳ تنه وژل شوي او ۱،۶۱۸ تنه نور ټپیان شوي دي. همدارنګه ۷۲۶ جسدونه له ویجاړو شویو ودانیو څخه راایستل شوي دي.
په همدې حال کې، د فلسطین د بندیانو چارو مرکز اعلان کړی چې د اسراییلو ځواکونو له تېرو شپو ورځو راپه دېخوا ۴۰ فلسطینیان، چې پکې څلور ښځې او یو شمېر پخواني بندیان شامل دي، د لوېدیځې غاړې په بېلابېلو سیمو کې نیولي دي.
ځايي سرچینو هم خبر ورکړی چې اسراییلي ځواکونو د څو اخطاریو په خپرولو سره د بیتالحم سوېل ختیځ ته د تقوع ښارګوټي په ختیځ سیمه کې د ۱۰ استوګنیزو واحدونو د جوړېدو د بندولو امر ورکړی دی. د دغو سرچینو په وینا، دا اقدامات د فلسطینیانو د ودانیزو چارو د محدودولو د سیاستونو په لړ کې او د ځمکو د کنټرول د هڅو په تړاو ترسره شوي دي.
