د پاکستاني درملو بندیز د افغانستان درمل بازار له کمښت او لوړو بیو سره مخ کړی
د طالبانو د حکومت لهخوا د پاکستاني درملو د وارداتو د بندیز پرېکړې سره هممهاله، د افغانستان د درملو بازار د کمښت او د بیو د پام وړ زیاتوالي سره مخ شوی دی. د فرانسې خبري اژانس د دوشنبې په ورځ، د دلوو په ۲۷مه، راپور ورکړی چې دا اقدام د درملو د اکمالاتو لړۍ ګډهوډه کړې او لګښتونه یې په څرګنده توګه لوړ کړي دي.
د دغه راپور له مخې، اوس اړینه ده چې درمل له نورو هېوادونو واخیستل شي؛ یو بهیر چې د انتقال موده اوږده کړې او د ترانزیت لګښتونه او لوژستیکي ستونزې یې ډېرې کړي دي. له دې وړاندې، د ترانسپورټ لګښتونه شاوخوا شپږ تر اووه سلنه د دوا د وروستي بیې برخه جوړوله، خو اوس دغه اندازه ۲۵ تر ۳۰ سلنې ته رسېدلې ده.
د دې بدلونونو له امله، د درملو سوداګرو او دواخانه لرونکو ته میلیونونه ډالر تاوان اوښتی دی. دا د لګښتونو زیاتوالی په داسې وخت کې رامنځته شوی چې د هېواد په ډېرو ولایتونو کې خلک د اړینو درملو د نشتوالي ستونزه لري؛ یوه موضوع چې د ناروغانو پر وضعیت د اغېزو په اړه اندېښنې زیاتې کړې دي.
د طالبانو د حکومت د عامې روغتیا وزارت د دې بندیز دلیل د پاکستان لهخوا د «جعلي او درغلیزو» درملو صادرات بللي دي. یاد وزارت ویلي چې چین، هند، ایران، ازبکستان، بنګلهدېش او بلاروس د بدیلو سرچینو په توګه په پام کې نیول شوي، او هند چې تر دې وړاندې دوهم لوی عرضه کوونکی و، کولای شي د درملو د لومړني منبع په توګه راڅرګند شي.
تېرې اوونۍ د طالبانو د حکومت د ماليې وزارت هم اعلان وکړ چې د پاکستاني درملو واردات به د هېواد په ټولو ګمرکونو کې بند وي. خو له دې پرېکړې سره سره، طالبانو تراوسه دا نهدي روښانه کړي چې د درملو له کمښت او د بیو له کنټرول سره به څنګه مقابله وکړي؛ یوه موضوع چې له چارواکو څخه د لا زیاتو وضاحتونو غوښتنه راولاړوي.
