ملګري ملتونه: په افغانستان کې د رواني ملاتړ چارې درېدلې دي
د ملګرو ملتونو د بشري همغږۍ دفتر ويلي چې په افغانستان کې د رواني روغتيا او ټولنيز ملاتړ اړوند فعاليتونه دا مهال درېدلي او بند شوي دي. دغه اداره په خپل تازه راپور کې د لاسرسي د وضعيت په اړه ټينګار کړی چې دا محدوديتونه د روغتيا پر حياتي خدمتونو مستقيم اغېز کړی دی.
د راپور له مخې، ښځې د نورو ډلو په پرتله د رواني روغتيا او ټولنيز ملاتړ خدمتونو ته زياتې اړې دي. ډېرې ښځې د ذهني فشارونو او ټولنيزو ستونزو د مخنيوي لپاره له دغو خدمتونو ګټه اخلي، او د دغو فعاليتونو درېدنه کولای شي پر دوی پراخې رواني او ټولنيزې اغېزې ولري.
دغه دفتر همدارنګه يادونه کړې چې د طالبانو اداره له دې وړاندې هم د ښځو د لاسرسي پر اساسي روغتيايي خدمتونو محدوديتونه لګولي وو. دا محدوديتونه، د رواني روغتيا له فعاليتونو د بنديز سره يو ځای، د ښځو د روغتيايي خدمتونو پر لاسرسي اندېښنې زياتې کړې دي.
بشردوستانه بنسټونو څو ځله خبرداری ورکړی چې د روغتيايي خدمتونو محدوديت، په ځانګړي ډول د رواني روغتيا په برخه کې، کولای شي پر ټولنه اوږدمهاله زيانونه ولري. دوی زياتوي چې دا حالت د محدودوونکو تګلارو د ژر بيا کتنې غوښتنه کوي.
