د طالبانو د مشهد سرقونسل له افغان سوداګرو سره وکتل او د کورني پانګونې غوښتنه یې وکړه
د طالبانو د ادارې سرقونسل په مشهد کې له یو شمېر افغان سوداګرو او اقتصادي فعالانو سره لیدنه کړې او د هغوی پر دې ټینګار کړی چې په افغانستان کې پانګونه وکړي. د طالبانو د ادارې قونسلګري په مشهد کې ویلي، نورمحمد متوکل په دې ناسته کې د سوداګرو ستونزې او ننګونې اورېدلې دي.
د دې استازولۍ د معلوماتو له مخې، په دې لیدنه کې هغه موضوعات هم څېړل شوي چې د افغان سوداګرو اقتصادي فعالیتونو او په ایران کې له هغوی سره د موجودو خنډونو پورې اړه لري. د طالبانو سرقونسل همدارنګه له سوداګرو غوښتي چې خپلې پانګې او اقتصادي وړتیاوې هېواد ته دننه انتقال کړي او په کورنیو پروژو کې ګډون وکړي.
متوکل د سوداګرو د ستونزو د منظمو حللارو لپاره د یوه مشورتي شورا د جوړېدو وړاندیز وکړ. ویل شوي چې دا وړاندیز د ناستې له یو شمېر ګډونوالو سوداګرو څخه هرکلی ترلاسه کړی دی.
په داسې حال کې پر کورني پانګونې ټینګار کېږي چې په وروستیو کلونو کې ګڼ شمېر افغان سوداګر د اقتصادي وضعیت او محدودیتونو له امله خپلې چارې له هېواده بهر ته انتقال کړې دي. سوداګر تمه لري چې د طالبانو اداره د باور جلبولو او د پانګونې د ملاتړ لپاره عملي اسانتیاوې او اړین ضمانتونه برابر کړي.
