د طالبانو مشر غواړي په اوو ولايتونو کې خپلې ځانګړې پوځې ځواکونه پراخ کړي
د طالبانو د ادارې مشر په خپل وروستي اقدام کې پرېکړه کړې چې اووه زره پوځيان په اوو مهمو ولايتونو کې ځای پر ځای او د خپل مستقيم فرمان لاندې تنظيم کړي. دا په داسې حال کې ده چې نوموړي له دې مخکې هم د ځانګړي ساتونکي کنډک درلود او د طالبانو د انتحاري ځواکونو يوه برخه يې هم رهبري کوله.
هغه سرچينې چې طالبانو ته نږدې دي وايي، د دې ډلې د مشر د ساتونکو دقيق شمېر او د هغه اړوند انتحاري ځواکونو شمېر د امنيتي حساسيتونو له امله نه دی افشا شوی. خو راپورونه څرګندوي چې د نوموړي د ساتونکو يوه مهمه برخه د “نورزي” قوم کسانو څخه جوړه ده، هغه قوم چې خپله د طالبانو مشر هم ورته اړه لري.
د طالبانو د مشر شخصي پوځې جوړښت پراخېدل په داسې حال کې ترسره کېږي چې ډېری افغانان له اقتصادي ستونزو او پراخو ټولنيزو محدوديتونو سره مخ دي. د پوځې ځواک زيات تمرکز په مشرۍ کې دا پوښتنې راولاړوي چې د طالبانو د ادارې لومړيتوبونه څه دي او دغه چارې به د هېواد پر امنيتي او سياسي وضعيت څه اغېز ولري.
هغه ولايتونه چې ټاکل شوي، رسمي اعلان شوي نه دي، خو ويل کېږي چې دغه سيمې د طالبانو له نظره د ستراتيژيکو او امنيتي اړخونو له مخې ځانګړی اهميت لري. د مشر پر شخص وفادارو ځواکونو زياتوالی ښيي چې هڅه کېږي دننه کنټرول لا پياوړی او دننه سيالۍ ښه اداره شي.
