د طالبانو د ادارې غبرګون د پاکستان د دفاع وزير څرګندونو ته
ذبيحالله مجاهد، د طالبانو د ادارې وياند، د پاکستان د دفاع وزير تازه څرګندونې «بېاساسه» بللې او ويلي دي چې دا اداره د پاکستاني چارواکو خبرو ته ارزښت نه ورکوي. هغه ټينګار کړی چې د طالبانو د ادارې تمرکز يوازې د افغانستان د «ملي حاکميت او ځمکنۍ بشپړتيا» پر دفاع دی.
مجاهد په يوې تازه مرکې کې ويلي، ځينې پاکستاني چارواکي په وروستیو ورځو کې د افغانستان پر وړاندې ناسم تبليغات او بېبنسټه تورونه لګولي دي. د ده په وينا، د دغو څرګندونو موخه د افغانستان پر ضد منفي فضا رامنځته کول دي، يوه موضوع چې د طالبانو اداره يې ردوي.
دا غبرګون په داسې حال کې څرګندېږي چې په وروستيو اوونيو کې د کابل او اسلاماباد ترمنځ د پولو او سياسي مسايلو پر سر لفظي شخړې زياتې شوې دي. دواړو خواوو يو بل د سرحدي سيمو د ناامنيو او بېثباتۍ په تړاو تورن کړي دي.
سره له دې شخړو، مجاهد ويلي چې د سيمې امنيت د هېوادونو ترمنځ «صادقانه همکارۍ» ته اړتیا لري، نه د تورونو تبادلې ته. د دواړو ګاونډيانو ترمنځ سياسي کړکېچونه په داسې حال کې دوام لري چې د کابل او اسلاماباد اړیکې په تېرو کلونو کې هم څو ځله د ستونزو او بدلونونو سره مخ شوې دي.
