۶۷۹ افغان کورنۍ له ایران او پاکستان څخه هېواد ته ستنې شوې
د افغان کډوالو د بېرته ستنېدلو بهیر په دوام کې، پرون ۶۷۹ افغان کورنۍ له ایران او پاکستان څخه افغانستان ته راستانې شوې دي. دغه کورنۍ د هېواد لوېدیځ او سوېل ختیځ له بېلابېلو پولو څخه بېرته ستنې شوې دي.
د محلي سرچینو د معلوماتو له مخې، ۱۶ کورنۍ د نیمروز ولایت د پل ابریشم له لارې او ۷ کورنۍ د هرات ولایت د اسلامقلعه له لارې هېواد ته داخلې شوې دي. دغه دوه لارې د افغانستان او ایران ترمنځ له مهمو پولو شمېرل کېږي.
همدارنګه، ۳۰ کورنۍ د قندهار ولایت د سپینبولدک له لارې، ۴ کورنۍ د هلمند ولایت د بهرامچې له لارې او ۶۲۲ کورنۍ د ننګرهار ولایت د تورخم له لارې افغانستان ته راستانې شوې دي. تورخم د افغانستان او پاکستان ترمنځ له اصلي پولو څخه شمېرل کېږي او د بېرته ستنېدونکو کډوالو ډېره برخه له همدې لارې هېواد ته راغلې ده.
د کډوالو د بېرته ستنېدلو لړۍ داسې مهال روانه ده چې ډېری راستانۍ شوې کورنۍ له اقتصادي ستونزو او د بنسټیزو اسانتياوو له نشتوالي سره په پوله او د هېواد په اصلي ښارونو کې مخ دي.
