شهزاده اندرو د د افغانستان محرم راپور له جفري اپستين سره شريک کړی
هغه اسناد چې بي بي سي ليدلي، څرګندوي چې د بريتانيا د شاهي کورنۍ پخوانی غړی شهزاده اندرو د بريتانيا د حکومت يو محرم راپور چې د افغانستان د پانګونې فرصتونو په اړه وو، له جفري اپستين سره شريک کړی دی. اپستين يو بندي نوموتی مجرم دی چې د جنسي جرمونو له امله محکوم شوی و. د تيمز وېلي پوليسو ويلي چې دوی دا ادعاوې تر څېړنې لاندې نيولي دي.
دغه سند په ۲۰۱۰ کال کې د بريتانيا د چارواکو له خوا چمتو شوی و، هغه مهال چې اندرو مونتبتن-وينډزر د سوداګرۍ او پانګونې ځانګړی استازی و. په راپور کې د هلمند ولايت د «لوړې ارزښت لرونکو سوداګريزو فرصتونو» يادونه شوې او د سرو زرو، يورانيم او نورو منرالو د احتمالي زېرمو په اړه خبرې شوې دي.
په يوه برېښنالیک کې چې د ۲۰۱۰ کال د دسمبر مياشتې پورې اړه لري، اندرو دغه سند «محرم راپور چې د هلمند د ولایتي بيا رغونې له ډلې لخوا چمتو شوی» بللی دی. راپور هممهاله له هغه سفر سره جوړ شوی و چې نوموړی يې هلمند ته کړی و، په هغه وخت کې چې بريتانوي ځواکونه د خپل پوځي ماموريت په ترڅ کې هلته موجود وو.
په دغه سند کې د مرمر، ايريديوم او توريوم د پام وړ زېرمو، او د تېلو او ګازو د احتمالي شتون يادونه هم شوې ده. په راپور کې دا هم راغلي چې د دغو موادو «د ارزانه استخراج امکان» شته. د بريتانيا د رسمي لارښوونو له مخې، د سوداګرۍ استازي مکلف دي چې سياسي او اقتصادي حساسې مالومات محرم وساتي.
شهزاده اندرو په ۲۰۱۹ کال کې وروسته له هغې له شاهي دندو استعفا وکړه چې د هغه اړيکه له جفري اپستين سره بربنډه شوه. نوموړي په ۲۰۲۲ کال کې د ورجينيا جيوفر له لوري د مدني دعوې موضوع پرته له دې چې قانوني مسئوليت ومني، حل کړه، او تل یې پر ځان لګېدلې تورونه رد کړي دي.
