ملګرو ملتونو د افغانستان لپاره د اقلیم پر وړاندې د مقاومو کورونو د جوړولو غوښتنه وکړه
د ملګرو ملتونو د استوګنې ادارې (UN-Habitat) په افغانستان کې اعلان کړی چې د اقلیمي بدلونونو پر وړاندې د مقاومو کورونو جوړول کولای شي د کورنیو زیانمنوونکې کچه د سېلابونو، سختې ګرمۍ او توپانونو پر وړاندې راټيټه کړي. دا اداره وايي، دغه ډول استوګنځي باید د ټولو خلکو لپاره د لاسرسي وړ او ټولشموله پاتې شي.
د دې ادارې په وینا، له اقلیم سره سمون لرونکي کورونه داسې طرحه کېږي چې د اقلیمي بدلونونو له امله د طبیعي پېښو پر وړاندې ډېر مقاومت ولري. افغانستان په وروستیو کلونو کې له پرلهپسې اقلیمي پېښو لکه ویجاړوونکو سېلابونو او بېسارې ګرمۍ څپو سره مخ شوی چې د هېواد په بېلابېلو سیمو کې یې پراخ زیانونه اړولي دي.
یونهبیتات ټینګار کړی چې د داسې استوګنځایونو د پراختیا کلیدي لاره د ټولنې پر محور ولاړې طرحې، هوښیار اقلیمي پلان جوړونې، د مقاومو ساختماني موادو کارونې او د هغو پالیسیو جوړول دي چې د خلکو اړتیاوې په لومړیتوب کې ونیسي.
دغه اداره باور لري چې د اوسېدونکو فعاله ونډه په طرحې او د ساختماني پروژو په پلي کولو کې کولای شي هم لګښتونه راکم کړي او هم ډاډ ورکړي چې د کورنیو واقعي اړتیاوې په پام کې ونیول شي. د کارپوهانو په وینا، د دې ډول تګلارې پراختیا کولای شي د اقلیمي بدلونونو له خطرونو سره د مبارزې لپاره یوه دوامداره حللاره وي.
