په ننګرهار کې د اوبهلګولو چینلونه د نړیوال خوړو پروګرام په ملاتړ بیارغول کېږي
د نړیوال خوړو پروګرام (WFP) ویلي چې د ننګرهار ولایت اوسېدونکي د اوږدمهاله مقاومت زیاتولو د پروګرامونو په لړ کې د محلي اوبهلګولو چینلونو د بیارغونې چارې ترسره کوي؛ دا اقدام د دې لپاره ترسره کېږي چې کرنیزو ځمکو ته د اوبو رسېدنه بېرته فعاله شي او د کورنیو معیشت ته وده ورکړل شي.
د دغه سازمان په وینا، یاد فعالیتونه د اوږدمهاله ملاتړیو پروګرامونو یوه برخه ده چې د محلي ټولنو د پیاوړتیا پر تمرکز لري. د افغانستان د ډېرو کرنیزو سیمو د اوبهلګولو چینلونه د کرنیزو ځمکو د اوبو د برابرولو اساسي وسیله ده او د هغوی زیانمن کېدل د بزګرانو پر عاید او تولیداتو مستقیم اغېز لري.
ننګرهار ولایت چې د افغانستان په ختیځ کې موقعیت لري، د هغو سیمو له ډلې ده چې ډېری اوسېدونکي یې پر کرنه متکي دي. د دې ولایت د اوبهلګولو بنسټونو بیارغونه کولای شي د کرنیزو حاصلاتو د زیاتوالي او د کورنیو د اقتصادي زیانمنۍ د کموالي لامل شي.
نړیوال د خوړو پروګرام تر دې مخکې هم ویلي وو چې د بیړنیو مرستو تر څنګ د وړو پرمختیايي پروژو پلي کولو ته پام کوي، تر څو محلي ټولنې د اقتصادي او اقلیمي ستونزو پر وړاندې لا پیاوړې شي.
