د ایران او طالبانو چارواکو د ماهیرود په پوله ناسته وکړه
د ایران او افغانستان ترمنځ د ماهیرود په پوله کې د دواړو هېوادونو چارواکي سره ولیدل. ددې ناستې پر مهال د ایران د خراسان جنوبی والي هاشمي د طالبانو له لوري د فراه والي ملا محمد حافظ مجاهد سره کتلي او خبرې یې کړي دي. دغه راز، د ایران د اسلامي جمهوریت سرقونسل مرحمتي هم په دې ناسته کې ګډون درلود.
د ایران په کابل کې سفارت له لوري خپرو شوو معلوماتو له مخې، دواړو پلاویو د ماهیرود د ځانګړې اقتصادي سیمې او سرحدي بازارچه لیدنه وکړه. ددې کتنې اساسي موخه دا وه چې د پوله باندي د مالونو د انتقال بهیر وضعیت وارزول شي او د بهیر د اسانولو لارې وموندل شي.
په داسې حال کې چې ایران هڅه کوي له افغانستان سره پر ګډو پولو خپلو اقتصادي او سرحدي اړیکو ته وده ورکړي، د ایران او د طالبانو د ادارې ترمنځ دا ډول ناستې دوام لري. دا تعاملات په داسې حال کې دوام لري چې د طالبانو حکومت لا هم د نړیوال مشروعیت له نشتون څخه رنځ وړي او دا مسله د دغو اړیکو پر پایلو پوښتنې راپورته کړې دي.
یاده دې وي چې د ماهیرود گذرگاه د ایران او د افغانستان د فراه ولایت ترمنځ یو له مهمو تجارتي لارو ګڼل کېږي؛ خو سره له دې اقتصادي اهمیت، لا هم د مدیریت، امنیت او تجارتي شفافیت په برخو کې ستونزې شته او نه دي حل شوې.
