په ننګرهار کې درې ترافیکي پېښو پنځه کسان وژلي
د ننګرهار د امنيې قوماندانۍ ويلي، په دغه ولايت کې د درې جلا ترافیکي پېښو له امله پنځه تنه مړه شوي او درې نور ټپيان دي.
د امنيې قوماندانۍ وياند سید طيب حماد وايي، لومړۍ پېښه د يکشنبې ماښام د تورخم–جلالاباد پر لويه لاره د ثمرخيل ولسوالۍ په سيمه کې شوې ده. د ده په وينا، يو تيلر له يو موټر ډول بابوجي سره ټکر کړی چې په پايله کې درې کسان مړه او درې نور ټپيان شوي دي.
د امنيې قوماندانۍ وياند زياتوي، دويمه پېښه هم د هماغې شپې په ترڅ کې د جلالاباد ښار د درېيمې امنيتي حوزې اړوند رامنځته شوه. په دې پېښه کې يو موټر ډول مازدا له يوه پلي تن سره ټکر وکړ او ياد کس له روغتون ته له لېږد وروسته ساه ورکړه.
د ده په وينا، درېيمه پېښه د ننګرهار د نهمې حوزې په سيمه کې شوې ده، چې پکې يو لاری له يو موټرسایکل سره وجنګېد او د موټرسایکل چلوونکی وژل شوی دی.
د ننګرهار امنيې قوماندانۍ د دغو پېښو د رامنځته کېدو کره لامل نهدی څرګند کړی، خو دا موضوع يو ځل بيا د ترافيکي خوندیتوب د څارنې او د سړکونو د مديريت په اړه پوښتنې راپيدا کوي.
طالب چارواکو لاندې پوليسو له چلوونکو او اوسېدونکو غوښتنه کړې چې د ترافيک قوانين مراعت کړي او د موټر چلولو پر مهال لازمه پاملرنه وکړي، څو له دې ډول وژونکو پېښو د بيا تکرار مخه ونيول شي.
