د برشنا شرکت د ۷۱۰ ميليونه افغانیو په ارزښت د پنځو برېښنايي پروژو تړونونه لاسلیک کړل
د برشنا شرکت د خبرپاڼې له مخې، نن چهارشنبه د برېښنا د پنځو سترې پرمختيايي پروژې تړونونه، چې ټوليز ارزښت يې ۷۱۰ ميليونه افغانۍ کېږي، د دې شرکت او يو شمېر کورنيو خصوصي شرکتونو تر منځ لاسلیک شول. دا تړونونه د برشنا شرکت د عمومي اجرائيوي رئيس عبدالحق همکار له خوا لاسلیک شوي دي.
د دغو پروژو په چوکاټ کې، د پروان ولايت د باریکآب صنعتي پارک لپاره د يو سبسټېشن جوړول شامل دي؛ پروژه چې موخه يې په دغه صنعتي سیمه کې د دوامدارې برېښنا برابرول دي. همدارنګه، پلان شته چې درې نور سبسټېشنونه د غزني ولايت د قرهباغ او مقر، او د زابل ولايت د شاجوی په ولسوالیو کې جوړ شي.
د ورکړل شويو معلوماتو له مخې، بله پروژه چې په دې بسته کې شامله ده، د کابل ښار د شپږم فېډر د زيات بار ستونزه حل کول او له هغې سره تړلې تخنيکي اړتیاوې برابرول دي. دا هغه ستونزه ده چې په وروستيو کلونو کې يې د کابل د ځينو سيمو اوسېدونکي له منظمې برېښنا څخه محروم کړي ول.
سره له دې چې دغه پروژې د برېښنا د زيربناوو د پياوړتيا لپاره ډېر اهميت لري، خو منتقدان ټينګار کوي چې د طالبانو اداره بايد د پروژو د تطبيق، د څار ميکانيزم او د کيفيت د تضمين په اړه روښانه جزئيات وړاندې کړي، څو ډاډ ترلاسه شي چې د عامه مالي سرچينې اغېزمن او د حساب ورکونې وړ توګه لګول کېږي.
