په ایجی سمندر کې د مهاجرو د کښتۍ او یونان د ساحلي ساتونکو د بېړۍ ټکر، ۱۴ تنه مړه شول
د یونان د ساحلي ساتونکو چارواکو ویلي چې د ایجي په سمندر کې د هغوی د یوې بېړۍ او د مهاجرو د یوې کښتۍ د ټکر له امله ۱۴ کسان خپل ژوند له لاسه ورکړی دی. دا پېښه د خیوس ټاپو ته نږدې هغه وخت رامنځته شوه چې د ساحلي ساتونکو ځواکونه په دغه سیمه کې په ګزمه بوخت وو.
د رویټرز خبري آژانس د راپور له مخې، د یونان د ساحلي ساتونکو یوه چارواکي ویلي چې هغوی یوه کوچنۍ کښتۍ لیدلې چې د مهاجرو ډکه وه او هغوی ته یې امر کړی و چې خپل مسیر بدل کړي او بېرته وګرځي. لږ وروسته دا کښتۍ د ساحلي ساتونکو له بېړۍ سره ټکر کړې ده.
د همدغه راپور له مخې، د پېښې په پایله کې د یونان د ساحلي ساتونکو دوه افسران ټپیان شوي او روغتون ته لېږدول شوي دي. همدارنګه، ۲۴ مهاجر له اوبو ژغورل شوي دي.
یو یوناني دولتي چارواکي ویلي چې په کښتۍ کې شاوخوا ۳۵ تنه سپاره وو. د یونان د ساحلي ساتونکو د څرګندونو له مخې، په دغه سیمه کې د لټون او ژغورنې عملیات د نورو بېړیو او مرستندویو کښتيو په مرسته لا هم روان دي — هغه عملیات چې یو ځل بیا د اروپا پر لور د اوبیزو تګلارو د مهاجرت خطرونه روښانه کوي.
