امسو: پاکستان کې د پنځو افغان خبریالانو نیول د اندېښنې وړ دي
د افغانستان د رسنیو د ملاتړ سازمان (امسو) ویلي چې د پاکستان پولیسو په تېرو اونیو کې پنځه افغان خبریالان نیولي دي؛ دا کار د دغه هېواد د خبریالانو د امنیتي وضعیت په اړه اندېښنې زیاتې کړې دي.
دا بنسټ په یوه اعلامیه کې چې د دوشنبې په ورځ، د سلواغې په ۱۳مه خپره شوې، ویلي دي چې په پاکستان کې د افغان خبریالانو د نیولو لړۍ په زیاتېدو ده او یو شمېر خبریالانو د جدي امنیتي اندېښنو له کبله له افشا کېدو ډډه کړې ده.
د امسو د معلوماتو له مخې، صمیم فروغ فیضي، خبریال، او عطاالرحمان شیرزاد، کمرهمین، د هغو کسانو له ډلې دي چې د پاکستان پولیسو نیولي وو. د دې سازمان په وینا، که څه هم دا کسان د ډېرو هڅو وروسته خوشې شول، خو د نیونو اصل د پراخو اندېښنو لامل ګرځېدلی دی.
امسو ټینګار کړی چې دا پېښې ښيي افغان خبریالان او د رسنیو کارکوونکي په پاکستان کې له جدي امنیتي ګواښونو، خپلسریو نیونو او د جبري شړلو له خطر سره مخ دي. دغه سازمان له هغو هېوادونو او بنسټونو څخه چې د خبریالانو د منلو ژمنه یې کړې ده، غوښتي چې د هغوی د امنیت د خوندي کولو لپاره په پاکستان کې عملي او مؤثر ګامونه پورته کړي.
