د طالبانو د اوبو او برېښنا وزیر د هرات د پاشدان بند وکوتل
ملا محمد یونس آخندزاده، د طالبانو د اوبو او برېښنا وزیر، د خپل سفر پر مهال هرات ته د پاشدان بند څخه لیدنه وکړه او د دغه بند عمومي وضعیت یې وڅېړه.
د اوبو او برېښنا وزارت وايي، وزیر په دې لیدنه کې اړوندو مسوولینو ته د پاشدان بند د ساتنې او مراقبت په اړه لازمې لارښوونې وکړې. یاد بند د هرات ولایت د اوبو د سرچینو د تأمین او مدیریت په برخه کې مهم رول لري.
په دې لیدنه کې مولوي عبدالسلام مستوفي آغا، د هریرود–مرغاب د حوزې عمومي رییس، ملا عبدالسلام هجرت، د هرات د کلیو د بیارغونې او پرمختګ رییس، حافظ خیرالله، د مخابراتو رییس، او د هرات ولایت د اوبو او برېښنا رییس هم وزیر سره ملګري ول.
سره له دې چې دا ډول پروژې د هرات اوسېدونکو لپاره ځانګړې ارزښت لري، تمه کېږي چې د طالبانو اداره د رسمي لیدنو تر څنګ، د اوبو د سرچینو د پایداره مدیریت او د خلکو د واقعي اړتیاوو د پوره کولو لپاره روڼ او ځواب ویونکي پروګرامونه هم وړاندې کړي.
