د خیبر پښتونخوا د تیراه درې له اوسېدونکو پراخ بېځایه کېدل د احتمالي پوځي عملیاتو تر خبرداري وروسته
په وروستیو اوونیو کې، د پاکستان د خیبر پښتونخوا په تیراه دره کې لسګونه زره اوسېدونکي له خپلو کورونو وتلو ته اړ شوي دي، وروسته له هغه چې د پوځي عملیاتو د احتمالي پیل په اړه اعلامیې خپرې شوې دي.
د سیمې اوسېدونکي وايي، دغه اعلامیې چې له جوماتونو خپرې شوې وې، په څرګند ډول د سیمو د تخلیې امرونه درلودل، او له امله یې کورنۍ، سره له دې چې د ژمي سختې یخنۍ روانه ده، ښاري او نژدې سیمو ته کډه کولو ته اړې شوې دي.
بېځایه شوي کسان د غرنیو لارو له ستونزو، سختې یخنۍ او د لومړنیو اړتیاوو لکه د سرپناه او خوړو له کموالي شکایت کوي او وايي، بېچمتو والي سره ډلهییز کوچ د دوی د ژوند وضعیت خورا سخت کړی دی.
په همدې حال کې، شاندانه ګلزار خان، د پاکستان د ملي اسامبلۍ پخوانۍ غړې، ادعا کړې چې د امریکا د بګرام هوايي اډې د ترلاسه کولو د ناکامۍ په صورت کې دې هېواد ته ژمنه ورکړل شوې چې په تیراه سیمه کې اډه جوړه شي.
هغې ویلي، دا موضوع د ځینو لوېدیځو دیپلوماتیکو کړیو له خوا مطرح شوې، خو ټینګار کوي چې دا ادعا نه ده تایید شوې او له قانوني پلوه هم د پوښتنې وړ ده. نوموړې همدارنګه ویلي چې په دې اړه کره او رسمي معلومات نه لري.
