د کليو د بیارغونې وزیر د بنسټونو پر نږدې همغږۍ ټینګار وکړ
د طالبانو د حکومت د کلیو د بیارغونې او پراختیا وزیر، ملا عبداللطیف منصور، د پرمختیایي او بشري بنسټونو له استازو سره په لیدنه کې ټینګار وکړ چې دا بنسټونه باید له وزارت سره نږدې همغږي ولري، څو د چارو د ښهوالي او د متوازن پرمختګ د پلي کېدو زمینه برابره شي.
منصور په دې غونډه کې وویل، د غونډې موخه دا ده چې د ستونزو د حل لپاره ګډې لارې ولټول شي او د پروژو په تطبیق کې همغږي زیاته شي. د ده په وینا، د خلکو د معیشت او امنیت تأمین د بنسټیزو اړتیاوو څخه دي او دواړه باید یو وخت ته پام شي.
هغه ادعا وکړه چې اوس مهال په افغانستان کې امنیت ټینګ دی او کورني او بهرني بنسټونه کولای شي په ټول هېواد کې فعالیت وکړي. خو منتقدان وایي، اداري محدودیتونه، د شفافیت نشتوالی او د طالبانو د ادارې لاسوهنې د ډېرو بشردوستانه بنسټونو د کار بهیر له ستونزو سره مخ کړی دی.
منصور زیاته کړه چې د خلکو د معیشت د ښهوالي لپاره بنسټونه د نظام ترڅنګ مسؤلیت لري او باید د کلیوالو اړتیاوو ته جدي پاملرنه وشي. ده وویل، شاوخوا ۷۰ سلنه د افغانستان خلک په کلیو کې ژوند کوي او دا سیمې د جګړو پر مهال سخت زیانمنې شوې دي.
د وزیر په وینا، د کلیو د بیارغونې او پراختیا وزارت د کلیو بنسټیزې اړتیاوې ښه پېژني او چمتو دی دا معلومات له اړوندو بنسټونو سره شریک کړي، څو پروژې په ګډه او هدفمند ډول عملي شي. ده ټینګار وکړ چې موخه د بنسټونو د بودجې ترلاسه کول نه دي، بلکې د هغې سمه کارونه د خلکو په ګټه ده.
په دې ناسته کې تاجمحمد بصیري د کورنیو بنسټونو په استازیتوب وویل، دوی له د کلیو د بیارغونې وزارت سره یو ځای کار کوي او هر څومره چې د وزارت، بنسټونو او ولایتي ریاستونو ترمنځ همغږي زیاته وي، د پروژو تطبیق به اغېزمن وي.
همدارنګه، د یونیسف د اوبو پروژو مدیر په افغانستان کې وویل، هغه بنسټونه چې د دې ادارې تر پوښښ لاندې فعالیت کوي، د کلیو د بیارغونې وزارت له خوا ټاکل شوي معیارونه په پروژو کې رعایتوي او ګډې همکارۍ دوام لري؛ موضوع چې د څارونکیو په اند، د خپلواکې څارنې اړتیا او د خلکو ته د مرستو د برابر لاسرسي ضمانت زیات روښانه کوي.
