سعودي سرچينې د اکسيوس د ايران ضد څرګندونو راپور رد کړ
يو جګپوړي سعودي چارواکي د امريکايي ويبپاڼې «اکسيوس» هغه راپور رد کړی چې پکې د عربستان د دفاع وزير د امريکا د سفر پر مهال د ايران پر ضد څرګندونې کړې بلل شوي دي. دغه چارواکي ويلي، دا ډول ادعاوې د رياض رسمي دريځ نه څرګندوي.
دغه سعودي مقام د «الشرق الاوسط» ورځپاڼې سره په مرکه کې ټينګار کړی چې د عربستان سياست د سيمهييزو بدلونونو په اړه نه دی بدل شوی او دا هېواد لا هم د امريکا او ايران ترمنځ د سولهييزو حللارو د موندلو لپاره د ديپلوماتيکو هڅو ملاتړ کوي، تر څو د سيمې تاوتريخوالی کم او امنيت او ثبات پياوړی شي.
د سرچينې په وينا، رياض په قاطع ډول له دې سره مخالف دی چې د ايران پر ضد د کومې پوځي حملې لپاره د عربستان هوايي يا ځمکني حريم وکارول شي، او دغه هېواد د تاوتريخوالي د مخنيوي او سياسي حللارو د ترجيح اصولو ته ژمن دی.
دا څرګندونې وروسته له هغې شوي چې «اکسيوس» ادعا کړې وه، خالد بن سلمان، د عربستان دفاع وزير، په امريکا کې د غونډو پر مهال د ايران ضد څرګندونې کړې دي. سعودي چارواکي ټينګار کړی چې عربستان تل د هېوادونو د حاکميت د درناوي او له هغو پوځي اقدامونو د ډډې کولو ملاتړ کړی چې کېدای شي د سيمې خطرناکې پايلې ولري، او باور لري چې د سيمهييزو شخړو حل د سياسي هوکړو او د نړيوالو قوانينو د مراعت له لارې شونی دی.
