طالبانو قاري سعيد خوستی د جهادي آثارو د ثبت مسئول وټاکه
د طالبانو ادارې قاري سعيد خوستی، چې د حقاني شبکې غړی بلل کېږي، د «طالبانو جهادي آثارو» د ثبت او ساتنې مسئول ټاکلی دی. دا پرېکړه په داسې حال کې شوې چې نوموړی پخوا له جدي حقوقي تورونو سره تړل شوی و.
د طالبانو په وينا، «جهادي آثار» هغه توکي دي چې پکې د ژېړ رنګ بېرلو ماینونه، د بمونو ډک موټرسایکلونه، ځانمرګي جلیقې او هغه سرودونه شامل دي چې د جنګ، تاوتریخوالي او ځانمرګي بریدونو ستاینه کوي؛ منتقدان دا کار د تاوتریخوالي څرګند ترویج ګڼي.
قاري سعيد خوستی پخوا د «جنسي تېري»، شکنجې او له یوې پخوانۍ طبي محصلې، الهه دلاورزي، سره د اجباري نکاح په تور تورن شوی و. سره له دې تورونو، تر اوسه هغه تر قانوني څېړنې لاندې نه دی راوستل شوی.
خوستی، چې د سراجالدین حقاني، د طالبانو د کورنیو چارو د وزیر، تر مشرۍ لاندې د حقاني شبکې غړی دی، تر دې وړاندې د کورنیو چارو وزارت ویاند هم پاتې شوی و. شاوخوا درې نيم کاله مخکې، د «تيري» او «اجباري نکاح» تر تورونو وروسته، له رسمي دندو ليرې شو؛ خو وروسته يې د اطلاعات او فرهنګ وزارت کې د سلاکار په توګه کار کاوه او اوس بيا د يوې دولتي دندې لپاره ټاکل شوی دی.
دغه ټاکنه په داسې حال کې شوې چې د طالبانو اداره تل د «عدالت» د ټينګښت خبرې کوي، خو د هغو کسانو پر وړاندې د قانوني څارنې نشتوالی چې د بشري حقونو په سرغړونو تورن دي، په ځانګړي ډول د دغه قضیې په څېر، د دغې ادارې د عدالت او حساب ورکونې پر بهير جدي پوښتنې راپورته کړي دي.
