د ګډ امنیت تړون سازمان د تاجکستان او افغانستان پوله پیاوړې کوي
د ګډ امنیت تړون سازمان ویلي چې د وسلهوالو نښتو او ناامنۍ د زیاتېدو د مهار لپاره به د تاجکستان سرحدي ځواکونه له پرمختللو پوځې تجهيزاتو او وسلو سره سمبال کړي. دا اقدام له هغو اندېښنو وروسته شوی چې د وسلوالو او قاچاقبرو د افغانستان له خاورې د نفوذ په اړه څرګندې شوې دي.
دا پرېکړه د جنورۍ په ۲۹مه وروسته له هغه وشوه چې د تاجکستان امنیتي ځواکونو د ختلان ولایت په سیمه کې له احتمالي د نشهيي موادو له قاچاقبرو سره نښته وکړه. د راپورونو له مخې، په دې نښته کې درې وسلهوال وژل شوي او نور کسان بېرته د افغانستان لور ته شاتګ ته اړ شوي دي. د تاجک چارواکي وايي، د عملیاتو پر مهال د وسلو، مهماتو او ۷۳ بستې نشهيي موادو په ګډون چرس او تریاک هم ضبط شوي دي.
د تاجکستان چارواکو ویلي، په وروستیو میاشتو کې د دې پولهیي سیمې ناامني په څرګنده توګه زیاته شوې ده. له اندېښنو ډکو پېښو څخه یوه د نومبر بریدونه وو چې راپورونه ښيي، دا بریدونه د تندلارو ډلو اړوند وسلهوالو ترسره کړي چې په ترڅ کې یې پنځه چینايي کارګران وژل شوي وو. د دې پېښې وروسته، چین په سرحدي سیمو کې خپلې ځینې زېربنایي او کانکيندنې پروژې ودرولې.
د انترفاکس خبري اژانس د راپور له مخې، د ګډ امنیت تړون سازمان سرمنشي، تالاتبیک مسادیکوف، ویلي چې دغه سازمان د هغو پوځې او تخنیکي تجهیزاتو لېست د بشپړولو په حال کې دی چې تاجکستان ته به وسپارل شي. هغه زیاته کړې چې دا تجهیزات د تاجک سرحدي ځواکونو د وړتیا د پیاوړتیا لپاره برابرېږي څو د افغانستان له خاورې د وسلهوالو او قاچاقبرو د نفوذ مخه ونیول شي، او د عرضه کوونکو د ټاکلو او تړونونو د لاسلیک بهیر روان دی.
که څه هم د تجهیزاتو د سپارلو نېټه لا نه ده ټاکل شوې، خو دا بدلونونه یو ځل بیا د سیمې هېوادونه د افغانستان د امنیتي وضعیت په اړه اندېښمن کړي دي. هغه وضعیت چې د طالبانو تر واک لاندې لا هم د وسلهوالو ډلو او قاچاقي شبکو د مهار په برخه کې له جدي ننګونو سره مخ دی، او اغېزې یې د افغانستان له پولو هاخوا هم احساسېږي.
د ګډ امنیت تړون سازمان د روسیې، بلاروس، قزاقستان، قرغیزستان او تاجکستان غړي لري، او ارمنستان هم په رسمي ډول د دې سازمان غړیتوب لري، که څه هم خپله ګډون یې ځنډولی دی.
