چین او بریتانیا د اوږدمهاله ستراتیژیک مشارکت پر سر هوکړه وکړه
چین او بریتانیا د دواړو هېوادونو د مشرانو د لیدنې پر مهال په بېجینګ کې موافقه وکړه چې خپل دوه اړخیزې اړیکې د «جامع، ستراتیژیک، باثباته او اوږدمهاله مشارکت» په چوکاټ کې پرمختګ ورکړي. د دواړو خواوو د چارواکو په وینا، د دې موافقې هدف دا دی چې د مختلفو برخو په کچه خبرې اترې او همکاري پیاوړې کړي.
د رسنیو د راپورونو له مخې، د چین ولسمشر شي جینپینګ او د بریتانيا لومړی وزیر، کير ستارمر، په خپلو خبرو کې چې د خلکو په ستر تالار کې ترسره شوي، د دواړو هېوادونو تر منځ د نوی فصل د پرانیستلو پر اړتیا ټینګار وکړ. د چین ولسمشر دا اړیکې د ستراتیژیک اهمیت وړ وبللې، او د بریتانیا لومړي وزیر اوسنی وضعیت «ښه» توصیف کړ.
کیر ستارمر تر ناستې وروسته وویل، د دواړو خواوو تر منځ څو عملي هوکړې شوې دي. د دې له جملې څخه یوه دا ده چې د بریتانیا وګړي به وکولای شي پرته له ویزې د تر ۳۰ ورځو پورې چین ته سفر وکړي. همدارنګه دواړه هېوادونه سلا شول چې د خدمتونو په برخه کې د دوه اړخیزې موافقې د خبرو د پیل امکان وڅېړي.
په همدې حال کې، شي جینپینګ د چین او بریتانیا د ملګرو ملتونو د امنیت شورا دایمي غړیتوب او د نړۍ د سترو اقتصادونو په توګه د دواړو هېوادونو د ځای په یادولو سره، د نړیوال سولې او ثبات د ساتنې په موخه د همکارۍ د پیاوړتیا غوښتنه وکړه. راپورونه ښيي چې بریتانیا د نړۍ له سترو د خدمتونو صادروونکو هېوادونو څخه ده، او د چین د دې برخې د زیاتېدونکې تقاضا له امله، بریتانوي شرکتونو ته د چین په بازار کې د فعالیت پراخېدل اسانېدای شي.
