د ښځو د ازادۍ فانوس غورځنګ د طالبانو نوی قانون وغنده
د افغانستان د ښځو د ازادۍ فانوس غورځنګ په يوه اعلاميه کې د طالبانو د ادارې نوی قانون، چې د «غلامۍ د رسمي کولو» په اړه دی، په کلکو ټکو غندلی او دا يې له انساني وقار سره ښکاره ټکر بللی دی.
په دې اعلاميه کې ويل شوي چې دا قانون نه له ديني پلوه مشروعيت لري، نه له حقوقي اړخه توجيه کېدلی شي او نه هم له بنسټيزو انساني ارزښتونو سره سمون لري. د دې غورځنګ غړو ټينګار کړی چې دا ډول فرمانونه په ځانګړې توګه د ښځو مقام او موجوديت نښه ګرځوي او د افغانستان پر ټولنه ژورې اغېزې پرېږدي.
غورځنګ دغه اقدام د «د انسان له وقار سره د رسمي جګړې اعلان» بللی او خبرداری يې ورکړی چې د انسان بېرته د «ملکيت» او «متاع» په توګه راګرځول د عدالت، اخلاقو او انساني مسئوليت د ړنګېدو نښه ده د طالبانو د ادارې په جوړښت کې.
په دوام کې فانوس غورځنګ غلامي يوه جنايت بللې، نه قانون، او له نړيوالې ټولنې او د بشري حقونو له مدافع بنسټونو يې غوښتي چې د هغو تګلارو په وړاندې چوپ پاتې نه شي چې د وګړو اساسي حقونه، په ځانګړي ډول د ښځو، په سيستماتيک ډول تر پښو لاندې کوي.
