د ملګرو ملتونو د پرمختیايي پروګرام (UNDP) ویلي چې افغانستان له جدي انرژۍ بحران سره مخ دی او د هېواد ډېری اوسېدونکي لا هم دوامداره برېښنا ته لاسرسی نه لري؛ داسې وضعیت چې د خلکو ورځنی ژوند او بنسټیز خدمتونه سخت اغېزمن کړي دي.
یاد بنسټ د دوشنبې په ورځ، د دلوې په شپږمه، په خپله وروستۍ راپور کې ویلي چې له اتیا سلنې څخه زیات افغانان له دوامداره برېښنا بې برخې دي او د هېواد د انرژۍ شبکه د نفوس د زیاتېدونکو اړتیاوو پوره کولو وړتیا نه لري. د UNDP په خبره، دنننۍ تولیدي وړتیا محدوده ده او موجود زیربناوې زړې او ناکاره پاتې شوې دي.
د راپور له مخې، ډېره برخه هغه برېښنا چې په افغانستان کې مصرفېږي، له ګاونډیو هېوادونو واردېږي. خو دغه واردات د تخنیکي ستونزو او د همغږۍ د کمزورۍ له امله ډېری وخت ناپایدار او د باور وړ نه دي. دغه تړاو د افغانستان د انرژۍ د شبکې د زیانمنۍ کچه نوره هم لوړه کړې ده.
UNDP زیاتوي چې د افغانستان کورنۍ په اوسط ډول هره ورځ یوازې له پنځو تر لسو ساعتونو پورې برېښنا لري، او په ډېرو سیمو کې د برېښنا ناڅاپي پرې کېدل یوه عادي خبره ګرځېدلې ده.
ملګرو ملتونو خبرداری ورکړی چې د دې وضعیت اغېزې یوازې د کورنیو د نارامۍ خبره نه ده، بلکې د دوامدارې برېښنا کمښت کولی شي روغتونونه او روغتیایي مرکزونه له مرګژوبلې سره مخ کړي، ځکه چې د برېښنا ګډوډي جراحي عملیات، عاجل خدمتونه او حیاتي پاملرنې تر جدي ګواښ لاندې راولي. تر څنګ یې، د طالبانو د ادارې لهخوا د انرژۍ د زیربناوو د مؤثر او ځوابویونکي پلان نشتون د دې بحران د دوام په اړه اندېښنې زیاتې کړې دي.
