د ملګرو ملتونو د سرمنشي مرستیاله روزماري ډيکارلو د طالبانو د اداري د کورنیو چارو له سرپرست سراجالدین حقاني سره د لیدنې پر مهال ویلي، چې د دوحې د بهیر د کاري ډلو راتلونکې غونډه به په کابل کې ترسره شي.
د طالبانو د ادارې د کورنیو چارو وزارت د یکشنبې په ورځ، د دلوې پر ۵مه نېټه، په خپره شوې خبرپاڼه کې ویلي، چې دواړو لورو په دې لیدنه کې د نړیوالې ټولنې د تعامل څرنګوالي، د نشهيي موادو پر ضد مبارزې همکارۍ، د افغانستان د اقتصادي ثبات وضعیت، د بانکي محدودیتونو د لرې کولو او د بشري مرستو د دوام په اړه خبرې کړې دي.
د ملګرو ملتونو مرستیالې سرمنشي ډيکارلو دغه راز ډاډ ورکړی، چې د دې بنسټ بشري مرستې به د افغانستان له خلکو سره دوام ولري — هغه مرستې چې د اقتصادي کړکېچ او پراخو محدودیتونو په شرایطو کې د میلیونونو افغانانو ژوند ته حیاتي بلل کیږي.
دغه لیدنه په داسې حال کې ترسره شوې چې له دې یوه ورځ وړاندې، روزماري ډيکارلو د طالبانو د ادارې د بهرنیو چارو له سرپرست امیرخان متقي سره هم لیدلي وو او د ملګرو ملتونو او د طالبانو د ادارې تر منځ د همغږۍ او تعامل په اړه یې خبرې کړې وې.
په همدې حال کې، د نړیوالو غونډو په کابل کې ترسره کېدل او د خبرو دوام په داسې شرایطو کې مطرح کېږي، چې د طالبانو اداره د افغان وګړو، په ځانګړې توګه د ښځو، د حقونو او بنسټیزو ازادیو د پراخو محدودیتونو له امله د نړیوالې ټولنې له جدي نیوکو سره مخ ده — یوه موضوع چې د دې تعاملونو پر څرنګوالي او کچې سیوری غوړولی دی.
