طالبانو د یوه اونۍ په ترڅ کې لږ تر لږه ۳۱ تنه په بېلابېلو ولایتونو کې شلاقي کړي
د طالبانو د ادارې سترې محکمې اعلان کړی چې د دغې ادارې تر امر لاندې محاکمو د تېرې یوې اونۍ په موده کې لږ تر لږه ۳۱ تنه په بېلابېلو ولایتونو کې د شلاق سزا ورکړې ده. د راپور له مخې، دغه سزاګانې په کابل، ننګرهار، بلخ، هرات او فاریاب ولایتونو کې عملي شوې دي.
د خپرو شوو معلوماتو له مخې، تر ټولو زیات موارد په ننګرهار ولایت کې ثبت شوي، هلته ۱۶ تنه شلاقي شوي دي. همدارنګه، ۶ تنه په کابل، ۳ تنه په بلخ، ۳ تنه په هرات او ۳ تنه په فاریاب ولایتونو کې د دې بدني سزا لاندې راغلي دي.
د طالبانو د ادارې سترې محکمې د دغو سزاګانو د تطبیق څرنګوالي او د تورنو کسانو د حالت په اړه ځانګړې څرګندونې نه دي کړې، خو راپورونه ښيي چې طالبان په ډېرو مواردو کې د شلاق سزا په عام محضر کې عملي کوي، یوه تګلاره چې تل یې د خلکو او بشري حقونو د سازمانونو منفي غبرګونونه راپارولي دي.
د دې ادارې په وروستي خبرپاڼه کې ویل شوي چې د چارشنبې په ورځ په کابل کې شپږ تنه د «غلا» په تور هر یو په ۳۹ شلاقو او درې کلن تطبیقي بند محکوم شوي دي. د دغو قضیو د محاکمې پروسې په اړه نور جزئیات نه دي خپاره شوي.
د طالبانو د ادارې لهخوا د بدني سزاګانو دوام، سره له دې چې د نړیوالو بشري حقونو او د انساني کرامت د مدافعو ادارو له ښکاره مخالفت سره مخ دی، د افغانستان د وګړو د بنسټیزو حقونو د نقض په اړه اندېښنې زیاتې کړي دي. دغه ادارې تل ټینګار کوي چې شلاق او نورې بدني سزاګانې غیرانساني چلند او د نړیوالو منل شویو اصولو خلاف دي.
د طالبانو د ادارې سترې محکمې تر دې وړاندې هم ویلي وو چې په ۲۰۲۵ کال کې لږ تر لږه شپږ تنه یې اعدام کړي او ۱،۱۱۸ تنه یې په ټول افغانستان کې د بېلابېلو تورونو له امله شلاقي کړي دي، دا شمېرې په هېواد کې د دغې سزا د دوام او پراختیا څرګندونه کوي.
