امريکايي سناتور د لاتين امريکا د سياسي نظامونو د بدلولو د واشنګټن پلانونه افشا کړل
د امريکا د متحده ايالاتو يو جمهوري غوښتونکی سناتور اعلان کړی چې واشنګټن د لاتين امريکا په يو شمېر هېوادونو کې، لکه کيوبا، نيکاراګوا او کولمبيا، د سياسي نظامونو د بدلون پلانونه تعقيبوي.
ريک سکاټ، د امريکا د سنا غړی، د فاکس نيوز سره په مرکه کې ويلي، “ما باور دی چې کيوبا به اصلاح شي، نيکاراګوا به سمون ومومي او راتلونکی کال به په کولمبيا کې يو نوی ولسمشر واک ته ورسېږي.” هغه دغه بدلونونه د واشنګټن د راتلونکي سيمهييز تګلوري يوه برخه وبلله.
دغه سناتور دا هم ادعا کړې چې د وينزويلا د مشر نيکولاس مادورو نيول کېدای شي د لا پراخو بدلونونو پيل وي؛ بدلونونه چې د ده په وينا، يوازې په وينزويلا نه محدودېږي، بلکې ټول لاتين امريکا به تر خپل اغېز لاندې راولي.
د دغه امريکايي چارواکي څرګندونې په داسې حال کې کېږي چې د متحده ايالاتو اوسنی ولسمشر، ډونالډ ټرمپ، د لاتين امريکا په اړه څو ځله دا سيمه د واشنګټن «شاته انګړ» بللې ده؛ يو دريځ چې د سيمې د خپلواک هېوادونو له لوري له سختو نيوکو سره مخ شوی او د مداخلې، سياسي فشار او پوځي ګواښونو اندېښنې يې زياتې کړې دي. دا چلند د ملي حاکميت د اصل د نقض پر وړاندې پراخې اندېښنې راپارولې دي.
