په هرات کې د نړيوالې ژغورنې د يو کارکوونکي د ترافيکي پېښې له امله مړينه
د نړيوالې ژغورنې کميټې (IRC) د يوې خبرپاڼې په خپرولو سره تاييد کړې چې د دې ادارې يو کارکوونکی د هرات ولايت د اسلامقلعه په سيمه کې د ترافيکي پېښې له امله مړ شوى دی. دا پېښه هغه مهال رامنځته شوې چې ياد کارکوونکی له دندې تر پاى وروسته د کور په لور روان و.
د ورکړل شويو معلوماتو له مخې، په دې پېښه کې د يادې ادارې دوه نور کارکوونکي هم سخت ټپيان شوي دي. ويل شوي چې ټپيان د عاجلې درملنې لپاره روغتون ته لېږدول شوي او د هغوی روغتيايي حالت تر څارنې لاندې دی.
په خبرپاڼه کې ويل شوي چې د نړيوالې ژغورنې د کميټې صف اول کارکوونکي د دې ادارې د ماموريت اساسي برخه جوړوي او د بشردوستانه مرستو رسولو کې حياتي رول لري. يادې ادارې ټينګار کړی چې د افغانستان په لرې پرتو او صعبالعبور سيمو کې د ټولنو د خپرېدو له امله د دغو کارکوونکو شتون او هڅې ځانګړې ارزښت لري.
کميټې زياته کړې چې په دې سختو شرايطو کې د مړ شوي کارکوونکي له کورنۍ، ټپي شويو کارکوونکو او د هغوی له کورنيو سره مرسته کوي او د خپل کاري ټيم تر څنګ ولاړه ده.
دغه بشردوستانه اداره له ۱۹۸۸ کال راهيسې په افغانستان کې فعاليت کوي او دا مهال په نه وولايتونو کې حضور لري. د نړيوالې ژغورنې کميټه په بنسټيزو روغتيايي خدمتونو، د کليوالو سيمو لپاره د خوندي زدهکړې چاپېريالونو په رامنځته کولو، د نغدو مرستو په وېش، د بيړنيو پناهځايونو، د څښاک اوبو او حفظالصحې په برابرولو، او همدارنګه د معيشتي فرصتونو او د نازکو ټولنو د مقاومت د پياوړتيا پروګرامونو کې فعاليت کوي.
