د خوست والي: له افغانستان څخه د باندې جهاد ته تګ جواز نه لري
د طالبانو د ادارې پورې تړلی د خوست والي د دې ولایت په يوې ديني مدرسې د فراغت په مراسمو کې اعلان وکړ چې د دوحې تړون له مخې له افغانستان څخه هېڅ ګاونډي يا بل هېواد ته د ګواښ اړولو اجازه نشته او د هېواد له پولو بهر د جهاد لپاره تګ روا نه دی.
عبدالله مختار په خپله وينا کې له اوسېدونکو او د طالبانو له غړو وغوښتل چې د دوحې تړون موادو او د کابل د علماوو وروستيو پرېکړو ته درناوی وکړي او د جهاد نيت سره نورو هېوادونو ته له تګ ډډه وکړي. هغه ټينګار وکړ چې يواځې بايد د هغو «شونو تعهداتو» په چوکاټ کې عمل وشي.
د خوست والي په عين وخت کې وويل چې جهاد د هغه څه پر وړاندې چې «د افغانستان پر خاوره يرغل» يې وباله، پر ټولو افغانانو فرض دی. دا دريځ — سره له دې چې د ګواښونو د پای ته رسېدو ادعا کېږي — لاهم پر پوځي ګفتمان او مذهبي بسيج تکيه کوي او د تاوتريخوالي د دوام په اړه اندېښنې زېږوي.
هغه همدارنګه د دې ولايت د ځان وژنو د پېښو په اړه د يوې نوې پرېکړې خبر ورکړ او ويې ويل، د دې ډول پېښو د تکرار مخنيوي لپاره د ځان وژونکو د جنازې او فاتحې ګډون يوازې د کورنۍ غړو ته محدود شوی دی. مختار زياته کړه چې دا پرېکړه امنيتي ادارو ته هم ابلاغ شوې ده.
د خوست والي همدارنګه ټينګار وکړ چې د بېګناه کسانو د وژنې عاملين دې د شرعي احکامو له مخې جزا ترلاسه کړي؛ يو موضوع چې د شفاف او خپلواک عدلي نظام د نه موجوديت له امله تل د بشري حقونو د نهادونو له نيوکې سره مخ ده.
په هماغه مراسمو کې د افغاني سرې مياشتې مشر شهابالدين دلاور وويل چې افغانستان له مختلفو دښمنانو او تبليغاتو سره مخ دی او د هغه په باور، دې حالت ته مقابله خدمت، تعهد او د خلکو يووالی غواړي. نوموړي له ګډونوالو وغوښتل چې له منفي تبليغاتو اغېزمن نه شي.
د پروګرام په پای کې ويناوالو د خلکو تر منځ د يووالۍ پر اهميت ټينګار وکړ. دا ټينګار په داسې حال کې شوی چې افغان وګړي د ټولنيزو او اقتصادي فشارونو او د مدني ازاديو د پراخو محدوديتونو له امله جدي پوښتنې راپورته کوي.
