د امارات ټول پوځي ځواکونه له يمن څخه بشپړ وتلي دي
د متحده عربي اماراتو د دفاع وزارت د جمعې په ماښام اعلان وکړ چې د دغه هېواد ټول پوځي ځواکونه په بشپړ ډول له يمن څخه بېرته ستانه شوي دي. وزارت وويل چې د ځواکونو وتل د وروستي پرېکړې له مخې د پاتې ماموريتونو د پای ته رسېدو او له نړيوالو همکارانو سره د همغږۍ په چوکاټ کې ترسره شوي دي.
د اماراتو د دفاع وزارت په رسمي بيان کې ويل شوي چې د ترورېزم ضد ټيمونو ماموريت په يمن کې پای ته رسېدلی او د ځواکونو د بېرته ستنېدو بهير بشپړ شوی دی. دغه وزارت له دې وړاندې، د سهشنبې په ورځ، د يمن د سياسي او امنيتي چټکو بدلونونو له امله د دغو ټيمونو د ماموريت پای اعلان کړی و.
په همدې مهال کې، رشاد العليمي، د يمن د ولسمشرۍ د مشرتابه شورا رئيس چې د سعودي ملاتړ لري، د اماراتو سره د ګډ دفاعي تړون د لغوه کېدو اعلان وکړ؛ يو اقدام چې د اماراتي ځواکونو د بشپړ وتلو لامل شو او دا بهير په ۲۴ ساعتونو کې بشپړ شو. نوموړي همدارنګه د ۹۰ ورځو بېړنی حالت اعلان کړ چې د هېواد د وېش د هڅو د مخنيوي لپاره د تمديد وړ دی.
په همدې ورځ، د سعودي په مشرۍ عربي ائتلاف اعلان وکړ چې د امارات له فجيره بندر څخه يمن ته د المکلا بندر پر لور لېږدول شوي پوځي تجهيزات او وسایط د هوايي بريدونو هدف ګرځولي دي. د سعودي بهرنيو چارو وزارت ټينګار وکړ چې د دغه هېواد ملي امنيت سره کرښه ده او هر هغه ګواښ به په جنوبي پولو کې په قاطع غبرګون سره مخ شي.
الرياض په ورته وخت کې ادعا وکړه چې امارات د جنوبي انتقالي شورا ځواکونه د حضرموت او المهرة ولايتونو کې د پوځي عملياتو لپاره هڅولي دي، خو د اماراتو بهرنيو چارو وزارت دا ادعا رد کړه او د سعودي د امنيت په اړه یې خپل ژمن پاتې کېدل يو ځل بيا څرګند کړل.
له دسمبر له پيل راهيسې، د جنوبي انتقالي شورا ځواکونه د حضرموت او المهرة ولايتونو کنټرول په خپلو لاسونو کې اخيستی دی؛ دغه دوه ولايتونه د يمن نږدې نيمايي خاوره جوړوي. دا تحول د کورني، سيمهييز او نړيوال غبرګون سبب شوی دی.
په همدې تړاو، احمد سعيد بن بریک، د جنوبي انتقالي شورا مرستيال، ويلي دي چې د عربي جنوب هېواد د جوړېدو امکان اوس تر هر وخت نږدې شوی دی. دغه شورا ادعا کوي چې د يمن جنوبي سيمې کلونه له پامه غورځول شوې دي او غواړي له شمال څخه جلا شي؛ خو د ځانمرسته يمني دولت دا دريځ رد کړی او د هېواد پر يووالي ټينګار کوي.
يمن د ۱۹۹۰ کال د مې په ۲۲مه نېټه د شمال د عربي يمن جمهوريت او د جنوب د دموکراتيک خلق جمهوريت له يوځای کېدو وروسته د يو واحد هېواد په توګه اعلان شو؛ يووالی چې اوس د وروستيو تحولاتو په رڼا کې له جدي ننګونو سره مخ دی.
