د طالبانو د لوړو زدهکړو وزیر د ځوانانو د موبایل کارونې له زیاتوالي اندېښنه څرګنده کړه
ندامحمد ندیم، د طالبانو د ادارې د لوړو زدهکړو وزیر، په یوه تازه وینا کې له ځوانانو وغوښتل چې د دیني مسایلو په برخه کې پر هغو معلوماتو تکیه ونه کړي چې د موبایل له لارې ترلاسه کوي، او خپل اصلي سرچینه دې کتاب وګرځوي.
هغه وویل، د موبایل کارونه یوازې هغه مهال د مسلکي چارو لپاره د منلو وړ ده چې لیکلي منابع شتون ونه لري؛ خو د ده په باور، په دیني مسایلو کې باید له موبایلي محتواو څخه د استفادې ډډه وشي.
دغه څرګندونې په داسې حال کې مطرح کېږي چې د طالبانو اداره له دې وړاندې هم په تعلیمي بنسټونو کې پر ډیجیټلي وسایلو محدودیتونه لګولي دي. د میزان میاشتې په جریان کې، د لوړو زدهکړو وزارت د پوهنتونونو له استادانو او له څلورم بست څخه ښکته مامورینو لپاره د هوښیار موبایلونو کارونه منع اعلان کړه.
منتقدان وايي، دا ډول تګلارې د دیني او علمي سواد د لوړولو پر ځای، د متنوعو زدهکړیزو سرچینو آزاده لاسرسي محدودوي او کېدای شي د لوړو زدهکړو پر کیفیت منفي اغېز ولري؛ په ځانګړي ډول هغه مهال چې په ډېرو ولایتونو کې کتابونه او چاپي مواد په پراخه توګه نه تر لاسه کېږي.
