۱۰۳ ټنه غیرمعیاري پروفیل له شیخ ابونصر فراهۍ بندره بېرته واستول شو
د معیار او کیفیت ادارې اعلان کړی چې د «سي چینل» په نوم د پروفیل یوه محموله چې ټول وزن یې ۱۰۳ ټنه وو، له ارزونې او د کیفیت له کنټرول وروسته ځکه بېرته د صادرونکي هېواد ته واستول شوه چې د هېواد له کورنیو معیارونو سره یې مطابقت نه درلود.
د دغې ادارې مسوولین وايي، د معیارونو د ارزونې او پلي کولو بهیر په دقت او پوره قاطعیت پرمخ ځي، څو د ټیټې کچې او بېکیفیته توکو له ننوتلو څخه د هېواد د بازارونو مخه ونیول شي؛ یو موضوع چې په مستقیم ډول د خلکو له روغتیا، خوندیتوب او د کورني بازار له باور سره تړاو لري.
اداره د معیار او کیفیت په خپلو ژمنو ټینګار کړی او زیاته کړې یې ده چې د کورنیو معیارونو پلي کېدل به په ټولو بندرونو او ګمرکي سیمو کې په جدي توګه تعقیبېږي او د هر ډول سرغړونې په وړاندې به قانوني ګامونه پورته کېږي.
خو اقتصادي کارپوهان ټینګار کوي چې د کنټرول په بهیر کې زیات شفافیت، منظم اطلاعرساني او د مسؤلو ادارو ځوابوینه کولای شي د عام باور د پیاوړتیا او د غیرمعیاري توکو د دوامدار مخنیوي لامل شي؛ هغه تمه چې د طالبانو تر ادارې لاندې له اړوندو ادارو لا هم شته.
