د طالبانو حکومت د ايران له شرکتونو سره د پنجشير–کابل د اوبو د لېږد پروژې په اړه خبرې کړي
د طالبانو تر ادارې لاندې د اوبو او انرژۍ وزارت ويلي، ملا عبداللطيف منصور، د دې وزارت وزير، له يو ګډ پلاوي څخه چې د ايراني شرکتونو استازي پکې شامل وو، د افغانستان د اوبو پروژو په اړه ليدنه او خبرې اترې کړې دي.
د خپرې شوې خبرپاڼې له مخې، د ايراني شرکتونو استازو د پنجشير ولايت څخه کابل ښار ته د اوبو د لېږد په پروژه کې د پانګونې چمتووالی څرګند کړی دی. دا پروژه د پلازمېنې د اوبو د اړتيا يوه برخه پوره کولو لپاره طرحه شوې ده.
په خبرپاڼه کې زياته شوې چې د طالبانو د اوبو او انرژۍ وزير له دې پلاوي غوښتي، له وزارت د تخنیکي ټيم سره خبرې وکړي، څو د تفاهمليک د لاسليک شرايط برابر شي او د کار راتلونکي پړاوونه د هغه له مخې پرمخ ولاړ شي.
پنجشير د افغانستان له غرنیو ولايتونو څخه دی چې د پام وړ اوبه لري. په تېرو کلونو کې د دې اوبو د کابل ښار ته د لېږد لپاره بېلابېل پلانونه جوړ شوي، خو ډېری یې د شفافيت، اداري ثبات او قانوني چوکاټ د نشتوالي له امله عملي نه دي شوي.
