د طالبانو د عدلیې وزیر د عمرې د سفر ستونزو د اغېزو په اړه سعودي ته خبرداری ورکړ
د طالبانو د عدلیې وزیر مولوي عبدالحکیم شرعي د اړوندو ادارو له مسؤولانو او د عمرې د حج د شرکتونو له اتحادیې سره په یوه ناسته کې خبرداری ورکړی چې د عمرې د سفرونو بې نظمۍ او ستونزې کولای شي د افغانستان او سعودي عربستان ترمنځ اړیکو ته منفي اغېز ورسوي او د افغان عمره کوونکو لپاره محدودیتونه رامنځته کړي.
د عدلیې وزارت د خبرپاڼې له مخې، دا ناسته نن دوشنبه د شیخالحدیث مولوي عبدالحکیم شرعي، د عدلیې وزیر، او د بېلابېلو ادارو د یو شمېر چارواکو په حضور کې جوړه شوې وه. په دې غونډه کې د حج او اوقاف، بهرنیو چارو، اطلاعاتو او فرهنګ وزارتونو، د ملي استخباراتو عمومي ریاست، د کابل نړیوال هوایي ډګر ریاست او د عمرې د شرکتونو د اتحادیې استازي ګډون درلود.
په غونډه کې د هغو ستونزو او ننګونو بحث وشو چې د افغان عمره کوونکو د سفرونو پر مهال په سعودي عربستان کې ورسره مخ کېږي. د مخدره موادو د قاچاق مخنیوی، د سفر لګښتونو کمول، او د هغو کسانو قضیې څېړل چې له عمرې وروسته بېرته هېواد ته نه راګرځي او د سعودي له لارې نورو هېوادونو ته د تګ هڅه کوي، د بحث اصلي محورها وو.
مولوي شرعي ټینګار وکړ چې سعودي عربستان د اسلامي نړۍ د مرکز په توګه یو مهم ځای لري، او افغان عمره کوونکي باید هلته د افغانستان ښه استازولي وکړي. هغه زیاته کړه که دا ستونزې دوام ومومي، نو ښايي د افغان عمره کوونکو پر تګ راتګ زیات محدودیتونه ولګول شي، چې دا به د کورنیو او په دې برخه کې د فعالیت کوونکو شرکتونو لپاره د اندېښنې سبب شي.
نوموړي همدارنګه په «د نظام د حیثیت د ساتلو» ټینګار وکړ او له اړوندو ادارو او د عمرې حج له اتحادیې یې وغوښتل چې د دغو ستونزو د حل لپاره ژر عملي ګامونه واخلي. په وروستیو کلونو کې د شفافیت نشتوالی، کمزورې اداره او د ادارو ترمنځ د همغږۍ نشتون له امله بیا بیا له لوري د خلکو نیوکې شوې دي.
د عدلیې وزارت وايي، د غونډې په پای کې پرېکړه وشوه چې یوه کمېټه د اطلاعاتو او فرهنګ وزارت د ګرځندوی د معینیت په مشرۍ او د نورو ادارو د استازو په ګډون جوړه شي، څو د عمرې د حج ستونزې وڅېړي او د حل لارې وړاندې کړي.
