په خوست کې له سړکونو د لاسفروشانو لېږد پيل شو
د خوست ښاروالۍ وايي چې د ښار د نظم د ښه کولو په موخه، هغه لاسفروشان، مېزونه او سوداګریز فعالیتونه چې پر سړکونو او پیادهروونو کې روان وو، ټاکلو ځایونو ته لېږدول شوي دي.
عبدالرشید عمري، د خوست ښاروال، ویلي چې دا اقدام د ښار د بېنظمۍ د مخنیوي او د خلکو د تګ راتګ د اسانتیا لپاره ترسره شوی او د دې عملي کېدو سره به د ښار نظم، ښکلا او ښاري اسانتیاوې لا ډېرې شي.
د نوموړي په وینا، دا پروګرام د طالبانو تر ادارې لاندې د ښار ادارو لهخوا عملي کېږي او له ښار مېشتو غوښتل شوي چې د دې پروګرام په پلي کولو کې همکاري وکړي. همدارنګه، ښاروالۍ ژمنه کړې چې د ټولو اړخونو ګټې به په دې بهیر کې په پام کې ونیول شي.
یوشمېر د خوست اوسېدونکي دا اقدام د ګڼهګوڼې د کمېدو او د ترافیکي ستونزو د هوارېدو لپاره مهم بللی، خو ټاکل کېږي چې د ښاري نظم تر پلي کېدو سره، د لاسفروشانو اقتصادي وضعیت او د هغوی د کار لپاره د مناسبو بدیلو فرصتونو برابرولو ته هم جدي پاملرنه وشي.
