د ملګرو ملتونو ځانګړي صندوق په افغانستان کې د بنسټیزو خدمتونو د پراختیا خبر ورکړی

د افغانستا‌ن لپاره د ملګرو ملتونو د باور ځانګړي صندوق اعلان کړی چې د بنسټیزو خدمتونو لاسرسی د بشري کرامت د ساتنې او د ټولنو د زغم د پیاوړتیا لپاره مهم رول لري او هڅې په دې برخه کې دوام لري.

د ورکړل شوو معلوماتو له مخې، دغه صندوق له د ملګرو ملتونو له اړوندو ادارو سره په ګډو مداخلاتو له لارې خپلې مرستې هغو سیمو ته متمرکزې کړې دي چې د خلکو لاسرسی په کې بنسټیزو خدمتونو ته محدود و او ډېرې اړتیاوې لري.

په اعلامیه کې زیاته شوې چې د نړیوالو تمویل کوونکو په مرسته او د ملګرو ملتونو د ادارو او پروګرامونو په همکارۍ، په روغتیا، زده کړو، د اوبو او حفظ الصحې (WASH) په برخو کې پروژې پلې شوې دي.

د بشري چارو کارپوهان ټینګار کوي چې د افغانستان د اوسني وضعیت په شرایطو کې د دغسې ملاتړ دوام د ټولنیزو او بشري زیان مننې د زیاتېدو د مخنیوي لپاره حیاتي ارزښت لري.