د ژمي سخت طوفان په امریکا کې د زرګونو الوتنو د لغوه کېدو او ځنډ لامل شو
راپورونه وايي، د ژمي سخت طوفان په متحده ایالاتو کې د زرگونو الوتنو د لغوه کېدو او ځنډ سبب شوی دی. د الجزیرې شبکې د الوتنو د څارنې له ویبپاڼې «فلایټاوییر» څخه په نقل راپور ورکړی چې د جمعې تر مازیګر څلور بجو (د امریکا د ختیځ ساحل وخت) پورې، ټولټال ۱،۵۸۱ الوتنې چې دننه امریکا، د امریکا په لور یا له دې هېواده پلان شوې وې، لغوه شوې او ۶،۸۸۳ نورې الوتنې له ځنډ سره مخ شوې دي.
د راپور له مخې، د نیویارک د ښار هوایي ډګرونو — جان ایف. کینډي، نیوآرک لیبرټي او لاګاردیا — مسافرو ته خبرداری ورکړی چې د الوتنو د لغوه کېدو یا ځنډ احتمال شته. د «فلایټاوییر» معلومات ښيي چې د لغوه شویو او ځنډېدلو ټولو الوتنو له نیمایي څخه ډېرې په همدې دریو هوایي ډګرونو کې ثبت شوې دي.
په هوایي شرکتونو کې، «جېټبلو» د ۲۲۵ لغوه شویو الوتنو په لرلو سره په لومړي مقام کې دی، ورپسې «ډیلټا ایرلاینز» د ۲۱۲، «ریپابلیک ایرویز» د ۱۵۷، «امریکن ایرلاینز» د ۱۴۶ او «یونایټېډ ایرلاینز» د ۹۷ لغوه شویو الوتنو سره ځای لري.
دا ګډوډي په داسې حال کې رامنځته شوې چې د امریکا د ملي هوا پېژندنې اداره خبرداری ورکړی چې د «ډووېن» په نوم ژمنی طوفان د هېواد په منځنیو لوېدیځو او شمال ختیځو برخو کې د سفر حالت خطرناک کولای شي او له درنې واورې سره مل وي.
راپورونه همدارنګه څرګندوي چې د امریکا له ۴۰ میلیونه ډېر اوسېدونکي د دې طوفان له اړوندو هوايي خبرداریو یا سپارښتنو لاندې دي. سربېره پر دې، د کالیفورنیا ایالت نږدې ۳۰ میلیونه اوسېدونکو ته هم د سېلاب یا طوفان خبرداری ورکړل شوی دی.
