د افغانستان ته د صادراتو کمېدو د پاکستان د سوداګرۍ کسر زیات کړی
د پاکستان دولتي بانک اعلان کړی چې د هېواد د سوداګرۍ بیلانس کسر د تېر کال په پرتله له ۳۹ سلنې ډېر زیات شوی او د افغانستان ته د صادراتو کمېدل د دې حالت یو له مهمو دلیلونو څخه دي.
د دغه بانک د راپور له مخې، له چین وروسته افغانستان دوهم لوی بازار دی چې د پاکستان صادرات ورته په څرګنده توګه کم شوي دي. دا کمښت په داسې حال کې راغلی چې د دواړو هېوادونو سوداګریزې اړیکې په وروستیو میاشتو کې له جدي محدودیتونو سره مخ دي.
راپور زیاتوي چې اسلاماباد د اکتوبر له لسمې نېټې راهیسې له افغانستان سره هر ډول سوداګري، په شمول د صادراتو، درولې ده؛ دا اقدام د دواړو لورو لپاره مستقیم اقتصادي اغېز لري.
رسمي شمېرې ښيي چې د پاکستان د سوداګرۍ بیلانس له ۴٫۴ میلیارده ډالرو څخه ۶٫۲ میلیاردو ډالرو ته لوړ شوی دی؛ یو زیاتوالی چې د پاکستان دولتي بانک یې علت د صادراتو کمېدل او د سیمهییزو بازارونو محدودېدل بللي دي.
له دې وړاندې، د افغانستان د سوداګرۍ او پانګونې خونې ویلي وو چې د همدې مودې په جریان کې د دواړو هېوادونو ترمنځ شاوخوا ۶۰۰ میلیونه ډالره سوداګري درېدلې او د افغانستان مېوې او سابه د ۵۰ میلیونه ډالرو په ارزښت د پاکستان په تګلارو کې خراب شوي دي؛ هغه موضوع چې د سوداګرو او د پولو د سیمو د اوسېدونکو سختې اندېښنې یې راپورته کړې دي.
