د کابل اوسېدونکي د کورونو د کرايې د لوړېدو له امله اندېښنه څرګندوي
يو شمېر د کابل ښار اوسېدونکي د کورونو د کرايې د زياتېدو له امله اندېښنه څرګندوي او وايي چې اقتصادي فشار د کرايې ادا کول ورپېچلي کړي او د دوی ورځنی ژوند يې اغېزمن کړی دی.
د دغو اوسېدونکو په وينا، د کرايې لوړېدل له هغه سره هممهاله دي چې د کورنيو عايدونه راټيټ شوي، او دا لامل شوی چې ډېری کسان اړ شي يا د کورونو بدلون وکړي او يا هم د نامناسبو استوګنځايونو منلو ته غاړه کېږدي. د هغوی په باور، دا حالت د کرايې په بازار کې د اغېزمنې مديريت د نشتوالي نښه ده.
دا په داسې حال کې ده چې د طالبانو د حکومت د عدليې وزارت مخکې ويلي وو، د ملکيت او کرايې د دفترونو د فعاليتونو د ارزونې بهير پيل شوی، څو د کورونو د کرايې د کنټرول او کمېدو لپاره ګامونه پورته شي. خو له دې اعلان سره سره، د کابل اوسېدونکي ټينګار کوي چې تراوسه په استوګنځای بازار کې کوم څرګند بدلون نه دی راغلی.
منتقدان وايي، د طالبانو د ادارې يوازې اعلام شوي اقدامات، که عملي څارنه او حسابورکونه ونه لري، پايله نه ورکوي. دوی غوښتنه کوي چې د څارنې بهير بايد په جدي، شفاف او مؤثر ډول تطبيق شي، څو د ټيټ عايد لرونکو کورنيو له زيات اقتصادي فشار څخه مخنيوی وشي.
