د قوشتپې او درزاب د برېښنا رسولو د پروژې تړون لاسليک شو
د طالبانو د اوبو او برېښنا وزارت اعلان کړی چې د جوزجان ولايت د قوشتپې او درزاب ولسواليو د برېښنا رسولو د پروژې تړون له يوې خصوصي کمپنۍ سره لاسليک شوی دی. د دې پروژې موخه د دغو دوو ولسواليو د استوګنيزو سيمو ته د برېښنا رسونه ده.
د ورکړل شويو معلوماتو له مخې، د پروژې ټول لګښت نږدې يو ميليارد او ۸۸۶ ميليونه افغانۍ اټکل شوی، او ټاکل شوې چې عملي کارونه يې په درېيو کلونو کې بشپړ شي.
د رياستالوزرا اقتصادي مرستيالي ويلي چې د دې پروژې په چوکاټ کې به د ۲۲۰ کيلوولټه برېښنا يوه ۸۵.۲۴ کيلومتره اوږده مزي (لين) وغځول شي، او همدارنګه به په قوشتپه او درزاب ولسواليو کې دوه سبستيشنونه او دوه وېشنۍکې جوړه شي.
د طالبانو د ادارې د چارواکو په وينا، د پروژې له بشپړېدو سره به زرګونه کورنۍ برېښنا ته لاسرسی ومومي. خو شنونکي ټينګار کوي چې د تطبیق شفافيت، اغېزمنه څارنه او د اساسي خدمتونو دوامدار لاسرسی هغه مهم مسؤليتونه دي چې د عامه ګټې پروژو د پلي کولو ادارې يې بايد تضمين کړي.
