د جاپان په ملاتړ د کابل ختيځ ته د جنتګل خان روغتيايي مرکز بيا رغول کېږي
د ملګرو ملتونو د مېشتېدو پروګرام (UN-Habitat) ويلي چې د جاپان د نړيوالې همکارۍ ادارې (JICA) په ملاتړ، د کابل ختيځو سيمو کې د «جنتګل خان» روغتيايي مرکز د بيا رغونې کار روان دی. دا هڅه د خلکو لپاره د لومړنيو روغتيايي خدمتونو د لاسرسي د ښه کولو په موخه ترسره کېږي.
د دې ادارې په وينا، د ميندو او ماشومانو ډېری مړينې د مخنيوي وړ دي، او فعال او د لاسرسي وړ روغتيايي خدمات د هغو ناروغيو د تلفاتونو په کمولو کې بنسټيز رول لري چې درملنه يې ممکنه ده. د جنتګل خان روغتيايي مرکز د سيمې د اوسېدونکو لپاره، په ځانګړي ډول د ښځو او ماشومانو، حياتي اهميت لري.
دا په داسې حال کې ده چې د طالبانو د واکمنېدو وروسته، د افغانستان روغتيايي نظام له جدي ستونزو سره مخ دی، چې پکې د تجهيزاتو کمښت، د نړيوالو مرستو راکمېدل او پراخ ټولنيز محدوديتونه شامل دي. دغه موضوعات د درملنې عادلانه لاسرسي ته، په ځانګړي ډول د ښځو لپاره، ډېر خنډونه پيدا کړي دي.
نړيوالو ادارو څو ځله ټينګار کړی چې په روغتيايي زيربناوو پانګونه، پرته له سياسي حالت څخه، يوه عاجله انساني اړتيا ده، او د طالبانو اداره مسئوليت لري چې د روغتيايي مرکزونو د بېخنډه فعاليت او د ټولو هېوادوالو، په ځانګړي ډول د ميندو او ماشومانو، د لاسرسي زمينه برابره کړي.
